कोरेगाव येथे १ मे रोजी आमदार महेश शिंदे यांच्या हस्ते मुख्य शासकीय ध्वजारोहण; प्रशासकीय तयारी पूर्ण

आमदार महेशदादा शिंदे यांच्या हस्ते होणार ध्वजारोहण; सकाळी ८ वाजता मुख्य सोहळा. ​कोरेगाव उपविभागीय कार्यालयाचे प्रांगण राष्ट्रभक्तीच्या रंगात न्हाणार

30 April, 2026

​कोरेगाव: जरंडेश्वर समाचार वृत्त जनसेवा: महाराष्ट्र राज्याच्या ६७ व्या वर्धापन दिनाचे औचित्य साधून कोरेगाव येथे शुक्रवार, दिनांक १ मे २०२६ रोजी मुख्य शासकीय ध्वजारोहण समारंभाचे आयोजन करण्यात आला आहे. कोरेगाव मतदारसंघाचे आमदार मा. महेशदादा शिंदे यांच्या हस्ते  ध्वजारोहण सोहळा संपन्न होणार असून, कोरेगाव उपविभागीय अधिकारी कार्यालयाच्या प्रांगणात सकाळी ८.०० वाजता हा मुख्य कार्यक्रम पार पडणार आहे.

​प्रशासकीय नियोजन आणि उपस्थिती

​महाराष्ट्र दिनाचे महत्त्व लक्षात घेता, कोरेगाव प्रशासन या सोहळ्यासाठी सज्ज झाले आहे. या कार्यक्रमाच्या यशस्वीतेसाठी उपविभागीय अधिकारी मा. प्रमोद कुदळे, तहसीलदार डॉ. संगमेश कोडे, नायब तहसीलदार संदीप चव्हाण, निवडणूक नायब तहसीलदार शारदा खाडे आणि निवासी नायब तहसीलदार सुनिता धिमते यांच्यासह उपविभागीय कार्यालय व तहसीलदार कार्यालयातील सर्व अधिकारी व कर्मचाऱ्यांनी विशेष पुढाकार घेतला आहे.

​या मंगल समयी तालुक्यातील सर्व आजी-माजी लोकप्रतिनिधी, स्वातंत्र्यसैनिक, सामाजिक कार्यकर्ते, शासकीय अधिकारी, कर्मचारी आणि कोरेगाव परिसरातील नागरिकांनी मोठ्या संख्येने उपस्थित राहावे, असे आवाहन प्रशासनाच्या वतीने करण्यात आले आहे.

​इतर कार्यालयांसाठी महत्त्वाच्या सूचना

​कोरेगाव मुख्यालयातील मुख्य शासकीय ध्वजारोहण सकाळी ८.०० वाजता आयोजित करण्यात आले आहे. या कार्यक्रमाची व्याप्ती आणि शिष्टाचार लक्षात घेऊन, प्रशासनाने कोरेगाव शहरातील इतर सर्व शासकीय व निमशासकीय कार्यालयांना विशेष सूचना दिल्या आहेत. त्यानुसार:

​मुख्य सोहळ्याच्या वेळी इतर ठिकाणी ध्वजारोहण करू नये.

​इतर कार्यालयांनी आपला ध्वजारोहण कार्यक्रम मुख्य सोहळ्याच्या वेळेच्या किमान अर्धा तास आधी किंवा अर्धा तास नंतर आयोजित करावा.

​सर्व शासकीय कार्यालयांच्या प्रमुखांनी व कर्मचाऱ्यांनी सकाळी ८.०० वाजता होणाऱ्या मुख्य सोहळ्याला उपस्थित राहणे अनिवार्य आहे.

​सोहळ्याचे महत्त्व

​१ मे १९६० रोजी संयुक्त महाराष्ट्राची निर्मिती झाली. या ऐतिहासिक घटनेला यंदा ६६ वर्षे पूर्ण होऊन ६७ व्या वर्षात पदार्पण होत असल्याने या सोहळ्याला विशेष महत्त्व प्राप्त झाले आहे. कोरेगाव उपविभागीय कार्यालयाच्या प्रांगणात होणाऱ्या या सोहळ्यासाठी आकर्षक सजावट आणि शिस्तबद्ध संचलनाचे नियोजनही करण्यात आले आहे.

​"महाराष्ट्र दिनाचा हा सोहळा राज्याच्या गौरवशाली परंपरेचे प्रतीक आहे. कोरेगाव तालुक्यातील नागरिकांनी या सोहळ्याला उपस्थित राहून कार्यक्रमाची शोभा वाढवावी." असे आवाहन प्रमोद कुदळे, उपविभागीय अधिकारी यांनी केली आहे.