गांधी मैदानावर २० एप्रिलला ‘भगवे वादळ’; उपमुख्यमंत्री एकनाथ शिंदे यांच्या उपस्थितीत राजाभाऊ बर्गे यांच्यासह शेकडो कार्यकर्त्यांचा शिवसेनेत जाहीर प्रवेश एल्गार! २० एप्रिलला साताऱ्यात उपमुख्यमंत्री एकनाथ शिंदे यांची तोफ धडकणार राजाभाऊ बर्गे प्रथम नगराध्यक्ष

अंगापूरच्या महागणपतीचे दर्शन घेऊन दौऱ्याचा प्रारंभ; गांधी मैदानावर होणार विराट जाहीर सभा

18 April, 2026

गांधी मैदानावर २० एप्रिलला ‘भगवे वादळ’; उपमुख्यमंत्री Eknath Shinde यांच्या उपस्थितीत राजाभाऊ बर्गे यांच्यासह शेकडो कार्यकर्त्यांचा शिवसेनेत जाहीर प्रवेश

​अंगापूरच्या महागणपतीचे दर्शन घेऊन दौऱ्याचा प्रारंभ; गांधी मैदानावर होणार विराट जाहीर सभा

​कोरेगाव | जरंडेश्वर समाचार वृत्त जनसेवा;

सातारा जिल्ह्यात शिवसेनेचे संघटनात्मक बळ वाढवण्यासाठी मोठी राजकीय घडामोड घडणार असून, उपमुख्यमंत्री तथा शिवसेना नेते एकनाथ शिंदे  यांच्या उपस्थितीत दि. २० एप्रिल रोजी साताऱ्यातील गांधी मैदानावर भव्य मेळावा व जाहीर पक्षप्रवेश सोहळा आयोजित करण्यात आला आहे. या कार्यक्रमात कोरेगावचे माजी (प्रथम) नगराध्यक्ष राजाभाऊ बर्गे यांच्यासह जिल्ह्यातील विविध मान्यवर नेते, पदाधिकारी व शेकडो कार्यकर्ते शिवसेनेत प्रवेश करणार असल्याची माहिती जिल्हा संपर्कप्रमुख शरद कणसे यांनी दिली.

या पार्श्वभूमीवर ‘भगवे वादळ उठणार’ अशी राजकीय चर्चा जिल्हाभर रंगू लागली असून, कोरेगाव विधानसभा मतदारसंघात मोठ्या प्रमाणात पक्षविस्तार होण्याची चिन्हे दिसत आहेत. बर्गे यांच्या नेतृत्वाखाली गावोगावी कार्यकर्ते ‘धनुष्यबाण’ हाती घेण्यासाठी सज्ज झाल्याचेही पदाधिकाऱ्यांनी सांगितले.

अंगापूर महागणपतीचे दर्शन; त्यानंतर सभा

उपमुख्यमंत्री शिंदे हे दौऱ्याच्या प्रारंभी अंगापूर येथील महागणपतीचे दर्शन घेणार असून, त्यानंतर ते थेट साताऱ्यातील गांधी मैदानावरील सभास्थळी दाखल होणार आहेत. सायंकाळी सुमारे ६ वाजता होणाऱ्या या सभेत ते कार्यकर्त्यांना मार्गदर्शन करणार असून, आगामी राजकीय दिशा स्पष्ट करण्याची शक्यता आहे.

आढावा बैठक व सत्कार सोहळा

या दौऱ्यात पश्चिम महाराष्ट्रातील शिवसेना पदाधिकारी व कार्यकर्त्यांची विशेष आढावा बैठक आयोजित करण्यात आली आहे. संघटनात्मक बळकटी, आगामी निवडणुकांची तयारी आणि स्थानिक पातळीवरील रणनीती यावर सविस्तर चर्चा होणार आहे.

तसेच जिल्हा परिषद व पंचायत समिती निवडणुकांमध्ये यश संपादन केलेल्या सदस्यांचा जाहीर सत्कार करण्यात येणार असून, सातारा जिल्ह्याच्या वतीने उपमुख्यमंत्री शिंदे यांचाही विशेष सत्कार सोहळा पार पडणार आहे.

२२०० कोटींचा निधी; कार्यकर्त्यांमध्ये उत्साह

शरद कणसे म्हणाले, “कोरेगाव मतदारसंघात उपमुख्यमंत्री शिंदे यांच्याविषयी प्रचंड आत्मीयता असून, त्यांच्या माध्यमातून सुमारे २२०० कोटी रुपयांचा विकासनिधी मंजूर झाला आहे. त्यामुळे मतदारसंघातील अनेक कार्यकर्ते व पदाधिकारी शिवसेनेत प्रवेश करण्यास उत्सुक आहेत.”

“राजाभाऊ बर्गे यांच्या नेतृत्वाखाली मोठ्या संख्येने कार्यकर्त्यांचा पक्षप्रवेश होणार असून, यामुळे शिवसेनेची ताकद लक्षणीय वाढेल,” असेही त्यांनी नमूद केले.

बर्गे यांना ठाम पाठबळ

कणसे पुढे म्हणाले, “उपमुख्यमंत्री शिंदे हे राजाभाऊ बर्गे यांच्या पाठीशी खंबीरपणे उभे आहेत. मतदारसंघाच्या विकासासाठी आवश्यक तेवढा निधी आणि राजकीय ताकद देण्याची त्यांची भूमिका स्पष्ट आहे.”

तसेच जिल्ह्याचे पालकमंत्री शंभूराज देसाई यांनीही कोरेगाव मतदारसंघाच्या विकासासाठी आवश्यक ते सर्व सहकार्य करण्याचे आश्वासन दिल्याचे यावेळी सांगण्यात आले.

सांगली-कोल्हापूरहूनही मोठी उपस्थिती

पश्चिम महाराष्ट्र संपर्कप्रमुख हनुमंत जगदाळे यांनी सांगितले की, सांगली व कोल्हापूर जिल्ह्यांतील शिवसैनिकांनी या मेळाव्यास मोठ्या संख्येने उपस्थित राहावे. सातारा जिल्ह्यातील नागरिक, विविध पक्षांचे कार्यकर्ते व युवकांनीही या ऐतिहासिक सभेला उपस्थित राहावे, असे आवाहन करण्यात आले आहे.

जिल्हाभर बैठका; प्रवेशासाठी रांग

दरम्यान, गेल्या आठवडाभरापासून सातारा जिल्ह्यात शिवसेनेच्या वतीने गावागावांत बैठका, विभागनिहाय आढावे आणि संघटनात्मक उपक्रम राबवले जात आहेत. अनेक ठिकाणी नव्या कार्यकर्त्यांचा प्रतिसाद वाढत असून, पक्षप्रवेशासाठी इच्छुकांची संख्या दिवसेंदिवस वाढत आहे.

‘नव्या राजकीय समीकरणांची चाहूल’

या भव्य पक्षप्रवेश आणि सभेमुळे सातारा जिल्ह्यात नव्या राजकीय समीकरणांची चाहूल लागली असून, आगामी निवडणुकांच्या पार्श्वभूमीवर हा कार्यक्रम निर्णायक ठरण्याची शक्यता व्यक्त केली जात आहे. शिवसेनेच्या वाढत्या प्रभावामुळे कोरेगावसह संपूर्ण जिल्ह्यात राजकीय वातावरण तापू लागले आहे.