सामाजिक समतेचा सन्मान; दीपक चव्हाण यांची जिल्हा बँकेच्या उपाध्यक्षपदी निवड!
श्रीमंत रामराजे नाईक निंबाळकर आणि श्रीमंत संजीवराजे नाईक निंबाळकर यांचा महत्त्वपूर्ण पुढाकार; अनुसूचित जातीच्या प्रतिनिधित्वाला मिळाला सन्मान
18 November, 2026
सामाजिक समतेचा सन्मान; दीपक चव्हाण यांची जिल्हा बँकेच्या उपाध्यक्षपदी निवड!
श्रीमंत रामराजे नाईक निंबाळकर आणि श्रीमंत संजीवराजे नाईक निंबाळकर यांचा महत्त्वपूर्ण पुढाकार; अनुसूचित जातीच्या प्रतिनिधित्वाला मिळाला सन्मान
सातारा : सातारा जिल्हा मध्यवर्ती सहकारी बँकेच्या उपाध्यक्षपदी माजी आमदार दीपक चव्हाण यांची निवड करून फलटणच्या राजघराण्याने सामाजिक समतेचा आणि सर्वसमावेशक नेतृत्वाचा महत्त्वपूर्ण संदेश दिला आहे. माजी जलसंपदामंत्री तथा विधान परिषदेचे माजी सभापती श्रीमंत रामराजे नाईक निंबाळकर आणि श्रीमंत संजीवराजे नाईक निंबाळकर यांनीमाजी आ. दीपक चव्हाण यांना जिल्हा बँकेच्या उपाध्यक्षपदाची संधी देत अनुसूचित जातीच्या प्रतिनिधित्वाचा सन्मान केला आहे.
सातारा जिल्हा मध्यवर्ती सहकारी बँक ही जिल्ह्याच्या सहकार क्षेत्रातील अत्यंत महत्त्वाची आणि प्रतिष्ठेची संस्था आहे. जिल्ह्यातील शेतकरी, सहकारी संस्था, विकास सोसायट्या आणि ग्रामीण अर्थव्यवस्थेच्या दृष्टीने या बँकेचे स्थान महत्त्वपूर्ण आहे. अशा महत्त्वाच्या संस्थेच्या नेतृत्वामध्ये अनुसूचित जातीच्या प्रतिनिधीला संधी मिळणे ही केवळ एका व्यक्तीची निवड नसून सामाजिक समावेशकतेच्या दृष्टीनेही महत्त्वाची बाब मानली जात आहे.
दीपक चव्हाण यांनी यापूर्वी आमदार म्हणून काम करताना आपल्या कार्याचा ठसा उमटवला आहे. राजकीय आणि सामाजिक क्षेत्रातील त्यांचा अनुभव, सहकार क्षेत्राची जाण आणि लोकांशी असलेला संपर्क या पार्श्वभूमीवर त्यांच्यावर सोपविण्यात आलेली ही जबाबदारी महत्त्वाची ठरणार आहे.
राजकारणात पदापेक्षा प्रतिनिधित्व महत्त्वाचे!
आजच्या राजकारणात सत्तेची पदे, राजकीय समीकरणे आणि पक्षीय वर्चस्व यांची चर्चा सातत्याने होत असते. मात्र, या सगळ्यापलीकडे जाऊन समाजातील विविध घटकांना निर्णयप्रक्रियेत स्थान मिळणे हे लोकशाहीचे खरे सामर्थ्य आहे. अनुसूचित जातीतील नेतृत्वाला जिल्ह्याच्या सहकार क्षेत्रातील महत्त्वाच्या पदावर संधी देणे, ही बाब सामाजिक न्यायाच्या विचाराला बळ देणारी आहे.
श्रीमंत रामराजे नाईक निंबाळकर आणि श्रीमंत संजीवराजे नाईक निंबाळकर यांनी मा.आ.दीपक चव्हाण यांच्या निवडीच्या माध्यमातून राजकीय विश्वास व्यक्त करण्याबरोबरच सामाजिक प्रतिनिधित्वालाही महत्त्व दिल्याची भावना व्यक्त होत आहे.
सहकार क्षेत्रात नव्या नेतृत्वाला संधी
सातारा जिल्हा बँकेच्या माध्यमातून जिल्ह्यातील शेतकरी, कष्टकरी, ग्रामीण भागातील नागरिक आणि सहकारी संस्थांच्या प्रश्नांना न्याय देण्याची मोठी जबाबदारी उपाध्यक्ष म्हणून मा.आ.दीपक चव्हाण यांच्यावर असणार आहे. त्यांच्या निवडीमुळे सहकार क्षेत्रात सामाजिक समतेचा विचार अधिक प्रभावीपणे पुढे येईल, अशी अपेक्षा व्यक्त होत आहे.
एकूणच, मा.आ.दीपक चव्हाण यांची उपाध्यक्षपदी झालेली निवड ही केवळ बँकेतील पदाची निवड न राहता सामाजिक प्रतिनिधित्व, राजकीय विश्वास आणि समतेच्या मूल्यांचा सन्मान करणारी घटना ठरली आहे. समाजातील सर्व घटकांना सोबत घेऊन विकासाची दिशा ठरविणे, हाच या निर्णयाचा व्यापक अर्थ असल्याचे राजकीय वर्तुळातून बोलले जात आहे.
— जरंडेश्वर समाचार

गणेशोत्सवात. कोकणात जाणाऱ्या भाविकांना टोलमाफी ; उपमुख्यमंत्री एकनाथ शिंदे यांनी घेतला निर्णय