काहीही करा, पण सातारा जिल्हा बँकेच्या सत्तेच्या चाव्या भाजपच्या हाती देऊ नका!

शंभूराज देसाईंकडे चार, मकरंद आबा पाटील यांच्याकडे आठ सदस्य; १२ जणांची मोट बांधल्यास सत्तास्थापनेचा मार्ग मोकळा मकरंद आबा पाटील यांना पहिले अडीच वर्षे अध्यक्षपद, तर शंभूराज देसाई यांना उपाध्यक्षपद; पुढील अडीच वर्षांसाठी पदांची अदलाबदल करण्याचा पर्याय चर्चे

06 November, 2026

काहीही करा, पण सातारा जिल्हा बँकेच्या सत्तेच्या चाव्या भाजपच्या हाती देऊ नका!

शंभूराज देसाईंकडे चार, मकरंद आबा पाटील यांच्याकडे आठ सदस्य; १२ जणांची मोट बांधल्यास सत्तास्थापनेचा मार्ग मोकळा

मकरंद आबा पाटील यांना पहिले अडीच वर्षे अध्यक्षपद, तर शंभूराज देसाई यांना उपाध्यक्षपद; पुढील अडीच वर्षांसाठी पदांची अदलाबदल करण्याचा पर्याय चर्चेत

सातारा : (लोक चर्चा ):-सातारा जिल्हा मध्यवर्ती सहकारी बँकेच्या सत्तास्थापनेवरून जिल्ह्यातील राजकीय वातावरण चांगलेच तापले आहे. बँकेच्या सत्तेच्या चाव्या नेमक्या कोणाच्या हातात जाणार, याकडे संपूर्ण जिल्ह्याचे लक्ष लागले आहे. या पार्श्वभूमीवर राज्याचे उपमुख्यमंत्री एकनाथ शिंदे, सातारा जिल्ह्याचे पालकमंत्री शंभूराज देसाई आणि राज्याचे पुनर्वसन मंत्री मकरंद आबा पाटील यांनी राजकीय प्रतिष्ठेपेक्षा जिल्ह्याच्या जनहिताला प्राधान्य देण्याची वेळ आली आहे.

पालकमंत्री शंभूराज देसाई यांच्या गटाकडे चार सदस्यांचे संख्याबळ असल्याची चर्चा आहे, तर मकरंद आबा पाटील यांच्या गटाकडे आठ सदस्य आहेत. या दोन्ही नेत्यांनी मनात आणले आणि एकत्रित राजकीय निर्णय घेतला, तर तब्बल १२ सदस्यांची ताकद उभी राहू शकते. बँकेत सत्ता स्थापनेसाठी आवश्यक संख्याबळाची जुळवाजुळव करण्याच्या दृष्टीने ही एक महत्त्वाची राजकीय शक्यता मानली जात आहे.

या संभाव्य समीकरणातून एक तडजोडीचा फॉर्म्युलाही पुढे येऊ शकतो. मकरंद आबा पाटील यांच्याकडे आठ सदस्यांचे संख्याबळ असल्याने पहिली अडीच वर्षे त्यांना अध्यक्षपद, तर चार सदस्यांचे संख्याबळ असलेल्या शंभूराज देसाई यांना उपाध्यक्षपद देण्याचा पर्याय स्वीकारता येऊ शकतो. त्यानंतर पुढील अडीच वर्षांसाठी अध्यक्ष आणि उपाध्यक्षपदांची अदलाबदल करण्याचा मार्गही खुला होऊ शकतो. अर्थात, हा राजकीय चर्चेतील संभाव्य फॉर्म्युला असून अंतिम निर्णय संबंधित नेत्यांनी घ्यायचा आहे.

भाजपला सत्तेपासून दूर ठेवण्याची जनभावना!

सातारा जिल्हा मध्यवर्ती सहकारी बँक ही केवळ एक आर्थिक संस्था नाही, तर जिल्ह्यातील शेतकरी, सहकार क्षेत्र आणि ग्रामीण अर्थव्यवस्थेचा आर्थिक कणा आहे. त्यामुळे या बँकेची सत्ता कोणाच्या हातात जाते, याला विशेष महत्त्व आहे. जिल्ह्यातील शेतकरी, सहकार क्षेत्रातील मान्यवर आणि सामान्य नागरिकांमध्ये भाजपला बँकेच्या सत्तेपासून दूर ठेवावे, अशी चर्चा सुरू असल्याचे चित्र आहे.

शंभूराज देसाई आणि मकरंद आबा पाटील यांनी एकत्र येऊन आपले संख्याबळ एकवटले, तर भाजपला सत्तेपासून दूर ठेवण्याचा पर्याय निर्माण होऊ शकतो. त्यामुळे कोणत्याही राजकीय प्रलोभनांना बळी न पडता, कोणत्याही दबावाला झुकता माप न देता दोन्ही नेत्यांनी जिल्ह्याच्या हिताचा निर्णय घ्यावा, अशी अपेक्षा व्यक्त होत आहे.

जिल्हा परिषदेत घडलेल्या राजकीय घडामोडींचा विसर पडू देऊ नका!

सातारा जिल्हा परिषदेमध्ये संख्याबळाचे राजकारण, सत्तास्थापनेसाठी झालेल्या राजकीय हालचाली आणि साम-दाम-दंड-भेदाच्या चर्चेच्या पार्श्वभूमीवर आता जिल्हा बँकेच्या सत्तास्थापनेकडे पाहिले जात आहे. त्यामुळे यावेळी तरी जिल्ह्यातील जनतेच्या भावना आणि राजकीय जनमताचा आदर केला जावा, अशी अपेक्षा व्यक्त होत आहे.

उपमुख्यमंत्री एकनाथ शिंदे हे सातारा जिल्ह्याचे भूमिपुत्र आहेत. शंभूराज देसाई हे जिल्ह्याचे पालकमंत्री आहेत, तर मकरंद आबा पाटील यांच्याकडेही महत्त्वाची मंत्रिपदे आहेत. या तिन्ही नेत्यांनी आपापसातील राजकीय मतभेद बाजूला ठेवून जिल्ह्याच्या सहकार क्षेत्राचे हित जपण्यासाठी पुढाकार घेण्याची गरज आहे.

बँकेच्या सत्तेचा निर्णय हा केवळ पदांचा व्यवहार नसावा!

जिल्हा बँकेच्या अध्यक्षपदासाठी कोणाला संधी मिळणार, उपाध्यक्षपद कोणाकडे जाणार, यापेक्षा बँकेच्या कारभारात पारदर्शकता, शेतकऱ्यांचे हित आणि सहकार क्षेत्राची विश्वासार्हता टिकवणे अधिक महत्त्वाचे आहे. जिल्ह्यातील जनतेच्या भावनांचा विचार न करता केवळ सत्तेची गणिते जुळवली गेली, तर त्याचे राजकीय परिणाम आगामी काळात दिसू शकतात.

आगामी विधानसभा आणि स्थानिक स्वराज्य संस्थांच्या निवडणुकांमध्ये जनतेचा कौल निर्णायक ठरणार आहे. त्यामुळे जनतेच्या अपेक्षांकडे दुर्लक्ष करून चालणार नाही. निवडणूक प्रक्रियेतील पारदर्शकतेबाबतही जनतेमध्ये जागरूकता वाढत असून, आगामी काळात सर्व निवडणुका बॅलेट पेपरवर घेण्याची मागणी अधिक तीव्र होण्याची शक्यता आहे.

लोकहिताला प्राधान्य द्या, लोक तुम्हाला डोक्यावर घेतील!

सातारा जिल्ह्यातील सहकार क्षेत्रातील मान्यवर, शेतकरी आणि सर्वसामान्य नागरिकांची अपेक्षा एवढीच आहे की, जिल्हा बँकेच्या सत्तेचा निर्णय घेताना राजकीय स्वार्थापेक्षा जिल्ह्याचे हित मोठे मानले जावे. शंभूराज देसाई आणि मकरंद आबा पाटील यांनी एकत्र येऊन १२ सदस्यांची ताकद उभी करण्याच्या शक्यतेचा गांभीर्याने विचार करावा.

भाजपला सत्तेपासून दूर ठेवण्यासाठी नव्हे, तर सातारा जिल्ह्याच्या शेतकऱ्यांच्या हितासाठी, सहकार क्षेत्राच्या स्वायत्ततेसाठी आणि बँकेच्या उज्ज्वल भविष्यासाठी योग्य निर्णय घ्यावा, हीच जनतेची आग्रही मागणी आहे.

लोकहिताला प्राधान्य द्या, लोक तुम्हाला डोक्यावर घेतील; अन्यथा उद्या हेच लोक तुम्हाला सत्तेचा घरचा रस्ता दाखवतील, हे विसरू नका!