जिल्हा बँकेच्या आखाड्यात विठ्ठल गोळेंचा 'फॅन' जोरात फिरणार? रांजणे विरुद्ध गोळे लढतीकडे संपूर्ण जिल्ह्याचे लक्ष; सोसायटी मतदारसंघातील बदलत्या समीकरणांची चर्चा

जावळीचा राजकीय आखाडा तापला!

31 October, 2026

जावळीचा राजकीय आखाडा तापला!

जिल्हा बँकेच्या आखाड्यात विठ्ठल गोळेंचा 'फॅन' जोरात फिरणार?

रांजणे विरुद्ध गोळे लढतीकडे संपूर्ण जिल्ह्याचे लक्ष; सोसायटी मतदारसंघातील बदलत्या समीकरणांची चर्चा

मेढा : (सुरेश बोतालजी )

सातारा जिल्हा मध्यवर्ती सहकारी बँकेच्या निवडणुकीच्या निमित्ताने जावळी तालुक्यातील सहकाराचे राजकारण पुन्हा एकदा ऐरणीवर आले आहे. यंदाच्या निवडणुकीत विठ्ठल गोळे यांच्या उमेदवारीची विशेष चर्चा रंगू लागली आहे. गोळे यांचा 'फॅन' यावेळी जोरात गरगर फिरणार असल्याची चर्चा सातारा जिल्ह्याच्या राजकीय वर्तुळात सुरू झाली आहे. निवडणुकीच्या निमित्ताने राजकीय वातावरण चांगलेच तापले असताना विठ्ठल गोळे यांच्या समर्थकांना मात्र आपल्या 'फॅन'मुळे हे तापलेले वातावरण थंड होईल, अशी अपेक्षा आहे. त्यामुळे जिल्हा बँकेच्या निवडणुकीत विठ्ठल गोळे यांचा 'फॅन' किती वेगाने फिरतो आणि मतदारांच्या कौलावर त्याचा कितपत परिणाम होतो, याची उत्सुकता शिगेला पोहोचली आहे.

जिल्हा बँकेच्या निवडणुकीच्या पार्श्वभूमीवर बाहेरगावी गेलेले मतदार आता परतीच्या प्रवासाला लागले असून, मतदानाच्या रणनीतीबाबत त्यांना मार्गदर्शन केले जात असल्याची चर्चा राजकीय वर्तुळात सुरू आहे. दुसरीकडे, आपल्या बाजूने अधिकाधिक मतदार वळवण्यासाठी दोन्ही राजकीय गटांकडून जोरदार प्रयत्न सुरू आहेत. त्यामुळे मतदानापूर्वीच जावळीतील राजकीय वातावरण चांगलेच तापले आहे.

जिल्हा बँकेच्या निवडणुकीत जावळीला पुन्हा प्रतिनिधित्व मिळवून देण्यासाठी ना. शिवेंद्रराजे भोसले यांनी नियोजनबद्ध रणनीती आखल्याचे सातारा येथे झालेल्या मेळाव्यातील उपस्थितीवरून दिसून आले. दुसरीकडे, पदवीधर मतदारसंघाच्या निवडणुकीत घवघवीत यश संपादन केल्याने राष्ट्रवादी काँग्रेसचे प्रदेशाध्यक्ष आमदार शशिकांत शिंदे यांच्या समर्थकांमध्ये उत्साहाचे वातावरण आहे. आपल्या नेत्याच्या नेतृत्वामुळे जावळी तालुक्याचे नाव राज्याच्या राजकारणात उंचावत असल्याची भावना सर्वसामान्य जावळीकरांमध्ये व्यक्त होत आहे.

अशा परिस्थितीत जिल्हा बँकेच्या सोसायटी मतदारसंघात शशिकांत शिंदे यांच्या नेतृत्वाला यश मिळावे, अशी अपेक्षा त्यांच्या समर्थकांकडून व्यक्त केली जात आहे. आपल्या नेत्याच्या राजकीय प्रतिष्ठेला धक्का पोहोचू नये, यासाठी सोसायटी मतदारसंघातील सदस्यांनी एकजुटीने मतदान करावे, अशी भूमिका काही कार्यकर्ते मांडत आहेत. जावळीच्या राजकीय वाटचालीला पुन्हा गतवैभव प्राप्त करून देण्यासाठी आमदार शशिकांत शिंदे यांचे निकटवर्तीय विठ्ठल गोळे यांना विजयी करण्यासाठी समर्थकांनी कंबर कसल्याची चर्चा आहे.

जिल्हा बँकेच्या निवडणुकीतील ४८ उमेदवारांपैकी ३८ उमेदवार ज्ञानदेव रांजणे यांच्या समर्थनार्थ गेल्या अडीच महिन्यांपासून बाहेरगावी असल्याचे सांगितले जात आहे. त्यामुळे संबंधित मतदारांच्या कुटुंबीयांना आपल्या माणसांच्या परतीची प्रतीक्षा लागली आहे. शनिवारी सायंकाळी सहलीवर गेलेले मतदार जिल्ह्यात परतणार असल्याने त्यांच्या व्यवस्थेबाबत स्थानिक नेत्यांची धावपळ सुरू होण्याची शक्यता आहे. मागील पंचवार्षिक निवडणुकीतील अनुभव आणि यावेळचे संभाव्य राजकीय डावपेच लक्षात घेता वसंतराव मानकुमरे आणि ज्ञानदेव रांजणे यांनी शिवेंद्रराजे भोसले यांच्या मार्गदर्शनाखाली विशेष खबरदारी घेतल्याची चर्चा राजकीय वर्तुळात आहे.

सोसायटी मतदारसंघात नवे राजकीय समीकरण!

सोसायटी मतदारसंघातील राजकीय गणिताने या निवडणुकीला वेगळे वळण दिले आहे. बँकेतील दहा वर्षांच्या कार्यकाळानंतर नव्या कार्यकर्त्यांना संधी मिळाली पाहिजे आणि सहकार क्षेत्रात नेतृत्वाची नवी फळी तयार झाली पाहिजे, या भूमिकेतून आमदार शशिकांत शिंदे यांनी स्वतःचा उमेदवारी अर्ज मागे घेत आपले समर्थक विठ्ठल गोळे यांना संधी दिली. त्यामुळे ज्ञानदेव रांजणे विरुद्ध विठ्ठल गोळे अशी अटीतटीची लढत रंगली आहे.

या मतदारसंघात ज्ञानदेव रांजणे यांच्याबाबत काही सोसायटी सदस्यांमध्ये नाराजी असल्याची चर्चा आहे. शिवेंद्रराजे भोसले यांच्याविषयी जावळीकरांच्या मनात आदर आणि आपुलकी असली, तरी त्याच भावनेचे प्रतिबिंब रांजणे यांच्या उमेदवारीला मिळेलच असे नाही, अशी भूमिका काही मतदार व्यक्त करत असल्याचे समजते. त्यामुळे या निवडणुकीत स्थानिक पातळीवरील नाराजी, वैयक्तिक संबंध आणि राजकीय समीकरणे महत्त्वाची ठरणार आहेत.

जावळीतील राजकीय वर्तुळात आणखी एका मुद्द्याची चर्चा रंगली आहे. यापूर्वी राष्ट्रवादी काँग्रेसचे प्रदेशाध्यक्ष शशिकांत शिंदे यांचा जावळीतील एका मताने झालेला पराभव अनेकांच्या जिव्हारी लागला होता. मात्र, आज शशिकांत शिंदे हे राष्ट्रवादी काँग्रेसचे प्रदेशाध्यक्ष म्हणून राज्याच्या राजकारणात महत्त्वाची भूमिका बजावत आहेत. त्यांच्या नेतृत्वामुळे जावळी तालुक्याची ओळख महाराष्ट्राच्या राजकीय पटलावर अधिक ठळक होत असल्याची भावना त्यांच्या समर्थकांमध्ये आहे.

विशेष म्हणजे, शशिकांत शिंदे यांचे मूळ गाव हुमगाव असल्याने त्यांच्याविषयी जावळीकरांमध्ये विशेष आत्मीयता असल्याचे समर्थक सांगतात. त्यामुळे आपल्या तालुक्याच्या या नेत्याला जिल्हा बँकेच्या निवडणुकीत कमीपणा येऊ नये, अशी भावना अनेक कार्यकर्त्यांमधून व्यक्त होत आहे. या भावनेतूनच विठ्ठल गोळे यांच्या उमेदवारीला बळ मिळत असल्याची चर्चा आहे.

विठ्ठल गोळे यांचे पारडे जड?

सोसायटी मतदारसंघातील बदलती राजकीय परिस्थिती पाहता विठ्ठल गोळे यांना अनुकूल वातावरण असल्याचा अंदाज काही स्थानिक राजकीय निरीक्षक व्यक्त करत आहेत. जावडेकर यांच्याकडूनही विठ्ठल गोळे बाजी मारतील, असा अंदाज व्यक्त केला जात असल्याचे समजते. मात्र, सहकाराच्या राजकारणात शेवटच्या क्षणापर्यंत समीकरणे बदलण्याची शक्यता नाकारता येत नाही.

दुसरीकडे, ज्ञानदेव रांजणे यांच्यासाठीही मतदारांशी संपर्क आणि संघटनात्मक बांधणी महत्त्वाची ठरणार आहे. नेत्यांचे प्रयत्न, स्थानिक कार्यकर्त्यांची भूमिका आणि सोसायटी सदस्यांचा प्रत्यक्ष कौल यावरच या निवडणुकीचे चित्र स्पष्ट होणार आहे.

एकंदरीत, जावळीतील ही लढत केवळ जिल्हा बँकेच्या एका जागेपुरती मर्यादित राहिलेली नाही. तालुक्यातील सहकाराचे राजकारण, स्थानिक नेतृत्वाची प्रतिष्ठा आणि राजकीय वर्चस्वाची लढाई म्हणून या निवडणुकीकडे पाहिले जात आहे. शशिकांत शिंदे यांच्या नेतृत्वाची प्रतिष्ठा आणि शिवेंद्रराजे भोसले यांच्या मार्गदर्शनाखालील राजकीय रणनीती यांची या निमित्ताने कसोटी लागणार आहे.

आता प्रश्न एवढाच आहे की, जावळीच्या राजकीय आखाड्यात कोणाची रणनीती यशस्वी ठरणार? रांजणे आपले वर्चस्व कायम राखणार की विठ्ठल गोळे यांच्या 'फॅन'चा वेग वाढणार? जिल्ह्यात राजकीय तापमान वाढले असताना गोळे यांचा 'फॅन' हे वातावरण थंड करणार का, याचे उत्तर मतपेटीतूनच मिळणार आहे. त्यामुळे संपूर्ण सातारा जिल्ह्याचे लक्ष या प्रतिष्ठेच्या लढतीकडे लागले आहे.