सातारा जिल्हा परिषदेत लोकशाहीचा 'रुद्र अवतार'; सदस्यांना अटक;पालकमंत्र्यांशी झटापट अन् हायव्होल्टेज ड्रामा!

सत्तासंघर्षाचा थरार: मतदानापूर्वीच दोन सदस्यांना अटकपरिषदेच्या स्थापनेपासून प्रथमच इतके खालच्या थराचे राजकारण; सातारकर स्तब्ध. साताऱ्यात राजकीय भूकंप!पालकमंत्री जखमी: झटापटीत पालकमंत्र्यांच्या हाताला दुखापत;

20 March, 2026

सातारा जिल्हा परिषदेत लोकशाहीचा 'रुद्र अवतार'; सदस्यांना अटक, पालकमंत्र्यांशी झटापट अन् हायव्होल्टेज ड्रामा!

​सातारा दि.२०मार्च २०२६ | (जरंडेश्वर समाचार वृत्त जनसेवा):-

सातारा जिल्हा परिषदेच्या अध्यक्ष-उपाध्यक्ष निवडीच्या प्रक्रियेत शुक्रवारी (२० मार्च २०२६) जिल्ह्याच्या राजकीय इतिहासातील सर्वात धक्कादायक आणि अभूतपूर्व घटनाक्रम पाहायला मिळाला. राष्ट्रवादी काँग्रेसचे दोन जिल्हा परिषद सदस्य अनिल देसाई आणि संदीप मांडवे यांना मतदानापूर्वीच पोलिसांनी ताब्यात घेतल्याने संपूर्ण निवडणूक प्रक्रिया वादाच्या भोवऱ्यात सापडली आहे. सत्तेसाठी पोलीस प्रशासनाचा गैरवापर झाल्याचा आरोप करत विरोधकांनी या घटनेला 'लोकशाहीचा काळा दिवस' संबोधले आहे.

​नेमका घटनाक्रम काय?

​जिल्हा परिषदेत मतदानासाठी सदस्य दाखल होत असतानाच अनिल देसाई आणि संदीप मांडवे यांना पोलिसांनी ताब्यात घेतले. त्यानंतर त्यांना तातडीने महाबळेश्वर पोलीस ठाण्यात नेण्यात आले. वैद्यकीय तपासणीसाठी त्यांना पुन्हा रुग्णवाहिकेतून साताऱ्यात आणले असता, त्यांनी पत्रकारांसमोर आपल्या भावनांना वाट मोकळी करून दिली.

​"आम्ही आमच्याच सहकाऱ्याचे अपहरण कसे करू शकतो? केवळ मतदानापासून वंचित ठेवण्यासाठी आमच्यावर खोटे गुन्हे दाखल करण्यात आले आहेत," असा खळबळजनक दावा अनिल देसाई यांनी केला आहे. यावेळी संदीप मांडवे यांनी पोलिसांकडून अमानुष मारहाण झाल्याचा आरोप केला असून त्यांच्या शरीरयष्टीवर मारहाणीच्या खुणा असल्याचे त्यांनी निदर्शनास आणून दिले.

​पालकमंत्र्यांना दुखापत; आमदारांचा तीव्र निषेध

​या राजकीय घडामोडींदरम्यान झालेल्या झटापटीत जिल्ह्याचे पालकमंत्री देखील जखमी झाले आहेत. त्यांच्या हाताला  दुखापत झाली असून, या प्रकरणी पालकमंत्र्यांनी कठोर भूमिका घेतली आहे. दोषींवर कडक गुन्हे दाखल करण्याचे आदेश त्यांनी दिल्याचे समजते.

​दरम्यान, आमदार शंभूराज देसाई, आमदार मकरंद पाटील आणि आमदार शशिकांत शिंदे यांनी या अटकेचा तीव्र निषेध केला आहे. लोकप्रतिनिधींना मतदानापासून रोखणे ही लोकशाहीची थट्टा असल्याची प्रतिक्रिया या नेत्यांनी दिली आहे.

​सोशल मीडियावर व्हिडिओंचा पूर; सातारकरांमध्ये संताप

​या संपूर्ण प्रकरणाचे व्हिडिओ इंस्टाग्राम आणि यूट्यूबवर व्हायरल झाले असून, त्यामध्ये झालेली झटापट आणि पोलिसांची कारवाई स्पष्टपणे दिसत आहे. जिल्हा परिषद परिसरात उपस्थित असलेल्या नागरिकांनी प्रशासनाच्या या भूमिकेवर तीव्र नाराजी व्यक्त केली आहे. सातारच्या राजकीय संस्कृतीत आजवर अशा पद्धतीचे खालच्या स्तरावरील राजकारण कधीही पाहायला मिळाले नव्हते, अशी भावना ज्येष्ठ नागरिकांमधून व्यक्त होत आहे.