सातारा पंचायत समितीवर भाजपचा 'झेंडा'; महेश गाडे सभापती तर सुषमा जाधव यांची उपसभापतीपदी बिनविरोध निवड

बिनविरोध निवडीचा गुलाल: राजकीय चढाओढीला पूर्णविराम; महेश गाडे आणि सुषमा जाधव यांची बिनविरोध निवड; श्रीमंत छत्रपती ​शिवेंद्रसिंहराजेंचा करिष्मा: मंत्र्यांच्या नेतृत्वाखाली भाजपचे वर्चस्व सिद्ध; १० सदस्यांच्या बळावर सत्ता काबीज.

16 March, 2026

सातारा पंचायत समितीवर भाजपचा 'झेंडा'; महेश गाडे सभापती तर सुषमा जाधव यांची उपसभापतीपदी बिनविरोध निवड

​आमदार शिवेंद्रसिंहराजेंच्या नेतृत्वाखालील भाजपची सत्ता; तालुक्याच्या राजकारणात प्रथमच कमळ फुलले

सातारा दि. १६ मार्च २०२६ (जरंडेश्वर समाचार वृत्त जनसेवा) : सातारा पंचायत समितीच्या राजकारणात भारतीय जनता पक्षाने आपले वर्चस्व सिद्ध केले असून, सभापतीपदी महेश गाडे तर उपसभापतीपदी सुषमा गणेश जाधव यांची बिनविरोध निवड करण्यात आली आहे. या निवडीसह सातारा पंचायत समितीवर प्रथमच भाजपचा सभापती विराजमान झाला असून, तालुक्याच्या राजकीय वर्तुळात या ऐतिहासिक बदलाची मोठी चर्चा रंगली आहे.

​सोमवारी पंचायत समितीच्या सभागृहात नवनिर्वाचित सदस्यांची विशेष बैठक बोलावण्यात आली होती. सभापतीपद सर्वसाधारण प्रवर्गासाठी आरक्षित असल्याने या पदासाठी राहुल शिंदे, प्रभाकर पवार आणि महेश गाडे यांची नावे चर्चेत होती. मात्र, ऐनवेळी पक्ष नेतृत्वाने महेश गाडे यांच्या नावावर मोहोर उमटवली. उपसभापतीपदासाठी सुषमा जाधव यांचा एकमेव अर्ज आल्याने त्यांचीही निवड बिनविरोध झाली. निवडीची घोषणा होताच कार्यकर्त्यांनी फटाक्यांची आतिषबाजी आणि गुलालाची उधळण करत जल्लोष केला.

​राजकीय समीकरणे आणि वर्चस्व

​नुकत्याच झालेल्या निवडणुकीत आमदार श्रीमंत छत्रपती शिवेंद्रसिंहराजे भोसले यांच्या नेतृत्वाखाली भाजपने १६ पैकी १० जागा जिंकून स्पष्ट बहुमत मिळवले होते. राष्ट्रवादी काँग्रेसला ५ तर शिवसेना (शिंदे गट) ला १ जागेवर समाधान मानावे लागले. बहुमताचा आकडा भाजपच्या बाजूने असल्याने ही निवड केवळ औपचारिकता मानली जात होती.

​'नव्या चेहऱ्या'ला संधी, 'अनुभवा'ला प्रतीक्षा

​सभापतीपदाच्या शर्यतीत पाटखळ गणाचे दोनवेळचे सदस्य राहुल शिंदे यांचे नाव आघाडीवर होते. मात्र, पक्ष नेतृत्वाने आगामी राजकीय गणिते आणि समतोल विकासाचे सूत्र डोळ्यासमोर ठेवून कोंडवे गणाचे सदस्य महेश गाडे या 'नव्या चेहऱ्या'ला संधी दिली. गेल्या कार्यकाळात सभापतीपद पश्चिम भागात असल्याने, यावेळी पूर्व भागाला प्रतिनिधित्व देऊन पक्षाने समतोल साधण्याचा प्रयत्न केल्याचे बोलले जात आहे.

​"तालुक्याच्या सर्वांगीण विकासासाठी सर्व सदस्यांना सोबत घेऊन काम करू. ग्रामीण भागातील रस्ते, पाणी आणि शेतकऱ्यांच्या प्रश्नांना आमचे प्राधान्य असेल."

— महेश गाडे, नवनिर्वाचित सभापती

​शिवेंद्रसिंहराजेंकडून अभिनंदन

​निवडीनंतर मंत्री श्रीमंत छत्रपती शिवेंद्रसिंहराजे भोसले यांनी नवनिर्वाचित पदाधिकाऱ्यांचे  अभिनंदन केले. स्व. भाऊसाहेब महाराज यांच्या मार्गदर्शनाखाली सुरू असलेला विकासाचा वारसा पुढे नेण्याचे आवाहन त्यांनी यावेळी केले. यावेळी भाजपचे पदाधिकारी, कार्यकर्ते आणि पंचायत समितीचे सदस्य मोठ्या संख्येने उपस्थित होते.