साताऱ्यात गॅस टंचाईचा भडका! आरपीआय आक्रमक; जिल्हाधिकाऱ्यांना निवेदनाद्वारे आंदोलनाचा इशारा

गॅस सिलेंडरचा तुटवडा तातडीने दूर करा, अन्यथा सोमवारी रस्त्यावर उतरणार: जिल्हाध्यक्ष गणेश भिसे यांचा इशारा

13 March, 2026

साताऱ्यात गॅस टंचाईचा भडका! आरपीआय आक्रमक; जिल्हाधिकाऱ्यांना निवेदनाद्वारे आंदोलनाचा इशारा

​गॅस सिलेंडरचा तुटवडा तातडीने दूर करा, अन्यथा सोमवारी रस्त्यावर उतरणार: जिल्हाध्यक्ष गणेश भिसे यांचा इशारा

​

​सातारा |दि.१३ मार्च २०२६  (जरंडेश्वर समाचार वृत्त जनसेवा):-

जिल्ह्यात गेल्या काही दिवसांपासून गॅस सिलेंडरचा तीव्र तुटवडा निर्माण झाला असून, सर्वसामान्य नागरिकांचे हाल होत आहेत. हा तुटवडा तातडीने दूर करून पुरवठा सुरळीत करावा, या मागणीसाठी रिपब्लिकन पार्टी ऑफ इंडियाच्या (आठवले गट) वतीने जिल्हाधिकारी कार्यालयावर धडक देण्यात आली. मागण्यांचे निवेदन जिल्हाधिकाऱ्यांना सादर करण्यात आले असून, प्रशासनाने दखल न घेतल्यास येत्या सोमवारी जनआंदोलन छेडण्याचा इशारा पक्षाने दिला आहे.

​रांगा आणि काळाबाजार:

आंतरराष्ट्रीय परिस्थितीचे कारण पुढे करून गॅस कंपन्यांकडून पुरवठा कमी होत असल्याचे सांगितले जात आहे. सातारा शहरातील 'इंडियन', 'भारत' आणि 'एचपी' गॅस एजन्सीबाहेर ग्राहकांच्या लांबच लांब रांगा लागत आहेत. भर उन्हात महिलांना तासन्तास ताटकळत उभे राहावे लागत आहे. याच टंचाईचा फायदा घेत काही ठिकाणी गॅसचा काळाबाजार सुरू असून, चढ्या दराने सिलेंडर विक्री होत असल्याचा आरोप आरपीआयने केला आहे.

​उपासमारीची टांगती तलवार:

निवेदनात म्हटले आहे की, गॅसअभावी घरगुती वापरासोबतच खानावळी आणि हॉटेल व्यवसायिकांचे कंबरडे मोडले आहे. यामुळे विद्यार्थी, नोकरदार आणि कामगारांवर उपासमारीची वेळ आली आहे. महागाईने होरपळलेल्या जनतेला आता गॅससाठीही वणवण करावी लागत असल्याने संताप व्यक्त होत आहे.

​उपस्थित पदाधिकारी:

हे निवेदन आरपीआयचे जिल्हाध्यक्ष गणेश भिसे व संजय गाडे यांच्या नेतृत्वाखाली देण्यात आले. यावेळी चंद्रकांत कांबळे, सुहास मोरे, शशिकांत गंगावणे, रवि वायदंडे, दत्तात्रय सावंत, सतीश कांबळे, शशिकांत खरात, नागेश सातपुते, ऋतुराज चांदणे, नलिनी घाडगे, सुनीता येवले, पायल गाडे, प्रतीक गाडे यांसह मोठ्या संख्येने कार्यकर्ते उपस्थित होते.