सातारा पालिकेच्या खर्चाचा हिशोब द्या, अन्यथा बेमुदत ठिय्या!

रिपब्लिकन सेनेचे नेते रमेश उबाळे यांचा इशारा; अनधिकृत बांधकामे, कंत्राटी कामगारांबाबत मागवली माहिती

09 March, 2026

सातारा पालिकेच्या खर्चाचा हिशोब द्या, अन्यथा बेमुदत ठिय्या!

​रिपब्लिकन सेनेचे नेते रमेश उबाळे यांचा इशारा; अनधिकृत बांधकामे, कंत्राटी कामगारांबाबत मागवली माहिती

​सातारा : दि.९ मार्च २०२६ (जरंडेश्वर समाचार वृत्त जेलसेवा) :-

सातारा नगरपालिकेच्या माध्यमातून सन २०२३-२४ आणि २०२४-२५ या आर्थिक वर्षात विविध विकासकामांवर व प्रशासकीय बाबींवर झालेल्या अवाढव्य खर्चाची सविस्तर माहिती एका महिन्याच्या आत लेखी स्वरूपात द्यावी; अन्यथा नगरपालिका कार्यालयासमोर बेमुदत आंदोलन छेडण्यात येईल, असा आक्रमक इशारा रिपब्लिकन सेनेचे महाराष्ट्र नेते रमेश उबाळे यांनी निवेदनाद्वारे दिला आहे.

​या संदर्भात नगरपालिकेला दिलेल्या निवेदनात उबाळे यांनी प्रशासनाच्या कारभारावर बोट ठेवत अनेक गंभीर मुद्द्यांवर स्पष्टीकरण मागितले आहे.

​अनधिकृत बांधकामांवर मेहेरनजर का?

शहरातील राजवाडा ते बॉम्बे रेस्टॉरंट, राजवाडा ते वाढे फाटा, पोवई नाका ते गोडोली नाका, पोवई नाका ते अजंठा चौक आणि पोवई नाका ते मोळाचा ओढा या प्रमुख मार्गांवर अनेक अनधिकृत बांधकामे उभी राहिली आहेत. यावर नगरपालिकेने आतापर्यंत काय कारवाई केली? असा सवाल उबाळे यांनी उपस्थित केला आहे. काही ठिकाणी राजकीय वरदहस्तामुळे कारवाई टाळली जात असल्याचा संशय व्यक्त करत, याबाबतचे लेखी उत्तर त्यांनी प्रशासनाकडे मागितले आहे.

​घनकचरा प्रकल्प अन् कर्मचारी वेतनाचा हिशोब द्या

नगरपालिकेच्या घनकचरा प्रकल्पावर गेल्या दोन वर्षांत झालेला वार्षिक खर्च, त्यातून पालिकेला मिळालेले प्रत्यक्ष उत्पन्न आणि खत विक्रीचा तपशील देण्याची मागणी करण्यात आली आहे. तसेच पालिकेतील एकूण कर्मचारी संख्या, त्यांची नावे, दरमहा होणारा वेतनाचा खर्च आणि विविध विभागांतील कंत्राटी कामगार, त्यांचे पगार, ठेकेदारांची संख्या व निविदा प्रक्रियेची माहिती 'जीआर'सह सादर करण्याचे आदेश त्यांनी दिले आहेत.

​घंटागाड्यांचा 'खर्च' रडारवर

नगरपालिकेकडे स्वतःच्या मालकीच्या किती घंटागाड्या आहेत आणि किती गाड्या भाड्याने घेतल्या आहेत? त्या चालवण्यासाठी किती चालक नियुक्त आहेत व त्यांच्या वेतनावर किती खर्च होतो, याचाही सविस्तर ताळेबंद उबाळे यांनी मागितला आहे.

​यासोबतच महाराष्ट्र जीवन प्राधिकरण विभागाकडून झालेला खर्च, पालिकेचे एकूण वार्षिक उत्पन्न, वसुली आणि कार्यालयीन खर्चाचा सविस्तर अहवाल एका महिन्यात सादर करावा, अशी मागणी करण्यात आली आहे. या तक्रारीमुळे नगरपालिका प्रशासनात खळबळ उडाली असून, प्रशासन ही माहिती वेळेत देणार का, याकडे सातारकरांचे लक्ष लागले आहे.

​