महाराष्ट्रातील प्रसिद्ध बावधन चं बगाड यात्रा! काशिनाथाचं चांगभलं!'च्या गर्जनेत बावधनचा यंदा बगाड्याचा मान विठ्ठल कदमांना!

भावाच्या आरोग्यासाठी घातलेलं साकडं ; १६ वर्षांनंतर नवसपूर्तीचा सुवर्णक्षण! भाविकांच्या श्रद्धेचा कस; ३७ व्या क्रमांकावर पडला नाथांचा 'उजवा कौल'! ​विठ्ठल कदमांच्या १६ वर्षांच्या तपश्चर्येला फळ; बागाड्याचा मानाचा तुरा शिरपेचात! ​कौल लागला अन् 'चांगभलं'चा जय

03 March, 2026

महाराष्ट्रातील प्रसिद्ध बावधन चं बगाड यात्रा!

काशिनाथाचं चांगभलं!'च्या गर्जनेत बावधनचा  यंदा बगाड्याचा मान विठ्ठल कदमांना!

​१६ वर्षांपूर्वीचा 'तो' नवस झाला पूर्ण; ८ मार्चला रंगपंचमीच्या मुहूर्तावर ऐतिहासिक बगाड यात्रा!

​वाई | ३ मार्च 2026 |सुरेश बोतालजी संपादक |(जरंडेश्वर समाचार वृत्त जनसेवा):- सातारा जिल्ह्याचेच नव्हे तर अवघ्या महाराष्ट्राचे श्रद्धास्थान असलेल्या वाई तालुक्यातील बावधनची ऐतिहासिक बगाड यात्रा यंदा रविवार, ८ मार्च २०२६ (रंगपंचमी) रोजी अत्यंत रणधुमाळीत आणि भक्तिमय वातावरणात साजरी होत आहे. साडेतीनशे वर्षांची देदीप्यमान परंपरा असलेल्या या यात्रेचा सर्वोच्च मान, म्हणजेच 'बगाड्या' होण्याचे भाग्य यंदा श्री. विठ्ठल सोपान कदम यांना मिळाले आहे. काळभैरवनाथाच्या चरणी घातलेल्या उजव्या कौलाने कदम यांच्या नावावर शिक्कामोर्तब होताच संपूर्ण बावधनमध्ये 'चांगभलं'चा एकच जयघोष करण्यात आला.

​६१ जणांतून लागला 'विठ्ठला'चा नंबर!

​होळी पौर्णिमेच्या त्या ऐतिहासिक रात्री काळभैरवनाथाच्या मंदिरात उत्कंठा शिगेला पोहोचली होती. यंदा या मानाच्या सेवेसाठी तब्बल ६१ नवसकरी कौलाला बसले होते. प्रत्येकाच्या मनात नाथांची सेवा करण्याची ओढ होती. अखेर, ३७ व्या क्रमांकावर बसलेल्या विठ्ठल सोपान कदम यांच्या बाजूने देवाने 'उजवा कौल' दिला आणि २०२६ च्या बगाड  म्हणून त्यांची घोषणा करण्यात आली.

​भावासाठी मागितलेलं मागणं अन् नाथांची कृपा!

​या निवडीमागे एक भावनिक आणि श्रद्धेची मोठी कहाणी आहे. सुमारे १६ वर्षांपूर्वी विठ्ठल कदम यांनी आपले बंधू रविंद्र सोपान कदम यांच्या खालावलेल्या प्रकृतीसाठी नाथांना साकडं घातलं होतं. "भावाचं आरोग्य सुधारू दे, तुझा बगाड घेईन," हा शब्द त्यांनी नाथांना दिला होता. नाथांच्या कृपेने बंधूंचे आरोग्य सुधारले आणि तेव्हापासून विठ्ठल कदम प्रत्येक वर्षी कौलाला बसत होते. अखेर १६ वर्षांच्या प्रदीर्घ प्रतीक्षेनंतर नाथांनी त्यांची हाक ऐकली असून, ही केवळ निवड नसून एका भक्ताची अग्निपरीक्षा आणि श्रद्धा पूर्ण झाल्याची भावना ग्रामस्थांमध्ये आहे.

​असा असेल उत्सव

​बावधनची ही यात्रा म्हणजे शिस्त, भक्ती आणि साहसाचा अद्भूत संगम आहे. यात्रेचे नियोजन लोकोत्सवाच्या स्वरूपात करण्यात आले आहे:

• ​शनिवार, ७ मार्च २०२६: श्रीनाथांचा दैदिप्यमान छबिना सोहळा.
• ​रविवार, ८ मार्च २०२६: रंगपंचमीच्या दिवशी मुख्य 'बगाड' सोहळा. ३० ते ४० फूट उंच बाभळीच्या रथावर बगाड्याला टांगून, खिल्लार बैलांच्या जोरावर हा रथ ओढला जाईल.
• ​सोमवार, ९ मार्च २०२६: भाविकांसाठी सुप्रसिद्ध लोकनाट्य तमाशा आणि दुपारी पैलवानांच्या दंडावर थाप पडणारा जंगी कुस्त्यांचा फड.

​गावची एकजूट आणि 'नाईक-क्षीरसागर' परिवाराची सेवा

​बावधन हे गाव ऐतिहासिक वैराटगडाच्या कुशीत वसलेले असून, येथील यात्रेचे व्यवस्थापन आजही तितक्याच काटेकोरपणे केले जाते. भोसले, पिसाळ, कदम, दाभाडे यांसह बारा बलुतेदार आणि समस्त ग्रामस्थ या सोहळ्यासाठी अहोरात्र कष्ट घेत आहेत. विशेष म्हणजे, गुरव नाईक क्षीरसागर आणि त्यांचा परिवार पिढ्यानपिढ्या ही सेवा आणि परंपरा अत्यंत निष्ठेने चालवत असून, त्यांच्या मार्गदर्शनाखाली हा सोहळा पार पडत आहे.

​यंदा लाखो भाविकांच्या उपस्थितीत होणाऱ्या या ऐतिहासिक यात्रेसाठी प्रशासन आणि ग्रामस्थ सज्ज झाले आहेत. विठ्ठल कदम यांच्या निवडीनंतर त्यांच्यावर अभिनंदनाचा वर्षाव होत असून, अवघ्या वाई तालुक्यात आता प्रतीक्षा आहे ती केवळ ८ मार्चच्या त्या थरारक बगाड सोहळ्याची!