राजकीय वार्तापत्र: कोरेगावात 'जायंट किलर' बॅकफूटवर; राष्ट्रवादीचा 'ग्राउंड गेम' यशस्वी

नितीनकाकांचे 'मायक्रो प्लॅनिंग' अन् शशिकांत शिंदेंची बांधणी ठरली 'गेमचेंजर'. ​दोन्ही राष्ट्रवादी गट एकत्र; एकसंघ फळीसमोर महायुतीची तटबंदी कोसळली. ​'कोरेगाव केसरी'च्या बालेकिल्ल्यात राष्ट्रवादीचा सुरुंग; स्थानिक समीकरणांचा विजय;.​४५ हजारांचे लीड पुसले

15 February, 2026

राजकीय वार्तापत्र: कोरेगावात 'जायंट किलर' बॅकफूटवर; राष्ट्रवादीचा 'ग्राउंड गेम' यशस्वी

​राजकीय वार्तापत्र, (सुरेश बोतालजी संपादक जरंडेश्वर समाचार) -

​कोरेगावच्या राजकारणात सध्या 'कधी ऊन, कधी सावली' असा खेळ पाहायला मिळत आहे. २०२४ च्या विधानसभा निवडणुकीत तब्बल ४५ हजार मतांचे विक्रमी मताधिक्य घेणारे आमदार महेश शिंदे यांना स्थानिक स्वराज्य संस्थांच्या निवडणुकीत बसलेला धक्का हा केवळ पराभव नसून, मतदारसंघातील सत्तासमीकरणांच्या पुनर्रचनेचे संकेत आहेत. विधानसभेची 'लाट' आणि स्थानिक निवडणुकांचे 'ग्राउंड रिअ‍ॅलिटी' यात मोठा फरक असल्याचे या निकालांनी अधोरेखित केले आहे.

​आकड्यांचा खेळ: ५० हजारांचा 'मॅजिकल स्विंग'

​विधानसभा निवडणुकीत महेश शिंदे यांच्याकडे असलेले ४६ हजारांचे लीड, स्थानिक स्वराज्य संस्थांच्या निवडणुकीत राष्ट्रवादीच्या ४,४५० मतांच्या आघाडीत रूपांतरित झाले आहे. राजकीय विश्लेषकांच्या भाषेत सांगायचे तर, हा जवळपास ५० हजार मतांचा मोठा 'स्विंग' आहे.

• ​जिल्हा परिषद: १० पैकी ६ जागांवर राष्ट्रवादीचे वर्चस्व.
• ​पंचायत समिती: १७ पैकी १२ जागा जिंकून राष्ट्रवादीची एकहाती सत्ता.

​रणनीती: खा.नितीनकाकांचे नियोजन अन् आ.शशिकांत शिंदेंची बांधणी

​या विजयामागे राष्ट्रवादीची (शरद पवार गट) 'मायक्रो-प्लॅनिंग' यशस्वी ठरल्याचे दिसते.

• ​खा.नितीन पाटील (नितीनकाका): राजकीय वाटाघाटी आणि निवडणूक व्यवस्थापनाची सूत्रे त्यांनी प्रभावीपणे हाताळली.
• आ.​शशिकांत शिंदे: पराभवानंतर खचून न जाता त्यांनी दोन्ही राष्ट्रवादी गटांना एकत्र आणून एकसंघ फळी निर्माण केली. गावपातळीवरील नाराजी दूर करण्यात त्यांना यश आले.

​ आ.महेश शिंदे यांच्यासमोरची आव्हाने

आ.​महेश शिंदे यांच्या पराभवाची किंवा पिछाडीची काही प्रमुख कारणे राजकीय वर्तुळात चर्चिली जात आहेत:

• ​चिन्हांचा गोंधळ: सातारा-खटावमध्ये 'कमळ' आणि कोरेगावात 'धनुष्यबाण' अशा दुहेरी भूमिकेमुळे कार्यकर्त्यांमध्ये संभ्रम निर्माण झाला.
• ​उमेदवारीतील असंतोष: एकंबे, वाठार स्टेशन आणि पाटखळ यांसारख्या महत्त्वाच्या गटांत स्थानिक कार्यकर्त्यांना डावलून बाहेरील किंवा आर्थिक निकषांवर दिलेली उमेदवारी त्यांच्या अंगलट आली.
• ​संवादाचा अभाव: मोठ्या विजयानंतर तळागाळातील कार्यकर्त्यांशी तुटलेला संपर्क राष्ट्रवादीसाठी पथ्यावर पडला.

​आगामी विधानसभेवर परिणाम?

​स्थानिक स्वराज्य संस्थांमधील हा विजय राष्ट्रवादीसाठी 'बूस्टर डोस' ठरला आहे. यामुळे आगामी विधानसभा निवडणूक कमालीची चुरशीची होणार, हे स्पष्ट आहे. आ.शशिकांत शिंदे यांनी आपले गमावलेले मैदान पुन्हा मिळवण्यास सुरुवात केली असली, तरी आ. महेश शिंदे यांना कार्यकर्त्यांच्या आत्मविश्वास निर्माण करावा लागेल. 

​कोरेगावच्या निकालाने हे सिद्ध केले आहे की, राजकारणात कोणताही विजय कायमस्वरूपी नसतो. 'कोरेगाव विकास 'केसरी'' म्हणून ओळखल्या जाणाऱ्या महेश शिंदे यांना आता आत्मपरीक्षण करून संघटनात्मक बांधणीत दुरुस्ती करावी लागेल, आत्मपरीक्षण करावे लागेल,तर दुसरीकडे राष्ट्रवादीला, हा 'झंझावात' विधानसभेपर्यंत टिकवून ठेवण्याचे आव्हान असेल..!