गणेशोत्सवात. कोकणात जाणाऱ्या भाविकांना टोलमाफी ; उपमुख्यमंत्री एकनाथ शिंदे यांनी घेतला निर्णय
साताऱ्यात सत्तेच्या चाव्या एकनाथ शिंदेंच्या शिवसेनेकडे; राष्ट्रवादी–शिवसेना समीकरण निर्णायक, भाजप विरोधी बाकांवर?
साताऱ्याच्या राजकारणात 'दादा-बाबा-बापू' एकत्र? भाजपच्या गोटात धाकधूक. बहुमताचा आकडा ३३, पण भाजप २७ वरच अडकली; शिवसेनेच्या १५ जागा ठरवणार अध्यक्ष!
10 February, 2026
साताऱ्यात सत्तेच्या चाव्या एकनाथ शिंदेंच्या शिवसेनेकडे; राष्ट्रवादी–शिवसेना समीकरण निर्णायक, भाजप विरोधी बाकांवर?
सातारा | सुरेश बोतालजी संपादक:
सातारा जिल्हा परिषद निवडणुकीच्या निकालांनी एक गोष्ट निर्विवाद सिद्ध केली आहे— राजकारणात केवळ 'मोठा पक्ष' असून चालत नाही, तर सत्तेच्या गणितात 'बेरीज' महत्त्वाची असते. ६५ गटांच्या या रणसंग्रामात २७ जागा जिंकून भारतीय जनता पक्ष सर्वात मोठा पक्ष ठरला असला, तरी बहुमताचा ३३ चा आकडा गाठताना भाजपची दमछाक होताना दिसत आहे. याउलट, १५ जागा जिंकलेली शिवसेना (शिंदे गट) आता 'किंगमेकर'च्या भूमिकेतून थेट 'किंगपिन' बनण्याच्या तयारीत आहे. राष्ट्रवादी काँग्रेसच्या २० जागा आणि शिवसेनेच्या १५ जागांचे समीकरण जुळल्यास ३५ या बहुमताच्या आकड्यांसह भाजपला सत्तेपासून दूर ठेवणे सहज शक्य आहे.
किंगमेकर शिवसेना, किंगपिन ठरणार का?
शिवसेनेची ताकद आज साताऱ्यात दोन्ही बाजूंनी निर्णायक आहे. भाजपला जिल्हा परिषदेवर झेंडा फडकवायचा असेल, तर शिवसेनेशिवाय पर्याय नाही. दुसरीकडे, राष्ट्रवादीला जर भाजपला रोखायचे असेल, तरीही शिवसेनेची साथ अनिवार्य आहे. मंत्री शंभूराजे देसाई यांच्या हातातील या 'सत्तेच्या चाव्या' आता साताऱ्याच्या राजकारणाची दिशा ठरवणार आहेत.
'चहा पे चर्चा' की सत्तेची शतरंज?
निकालांनंतर लगेचच मंत्री शंभूराजे देसाई यांच्या निवासस्थानी झालेली बैठक केवळ 'शुभेच्छा भेट' नव्हती. या बैठकीला रामराजे नाईक निंबाळकर, मंत्री मकरंद पाटील आणि खासदार नितीन काका पाटील यांसारख्या दिग्गजांची उपस्थिती बरेच काही सांगून जाणारी आहे. जिल्ह्याच्या राजकारणात 'दादा-बाबा-आणि-बापू' एकत्र आल्यास भाजपची मोठी अडचण होऊ शकते. या चर्चेतून जिल्ह्याच्या सत्तेचा नवा 'सातारा पॅटर्न' आकार घेत असल्याचे स्पष्ट संकेत मिळत आहेत.
युतीतील संघर्षाचा परिपाक
विधानसभा आणि लोकसभेच्या निवडणुकीत एकत्र लढलेल्या महायुतीत स्थानिक स्वराज्य संस्थांच्या निवडणुकीत मात्र मोठी दरी पाहायला मिळाली.
- वाईमध्ये भाजपने मकरंद पाटील यांच्या वर्चस्वाला धक्का देण्याचा प्रयत्न केला.
- पाटण आणि कोरेगावमध्ये शिवसेनेच्या शंभूराजे देसाई आणि महेश शिंदे यांना टार्गेट करण्यात आले. या 'जिरवा-जिरवी'च्या राजकारणामुळेच आज सातारा जिल्हा परिषदेत त्रिशंकू अवस्था निर्माण झाली आहे. मित्रपक्षांनीच एकमेकांचे पाय ओढल्याने भाजप मोठा पक्ष असूनही आज एकाकी पडल्याचे चित्र आहे.
पंचायत समितीचे चित्र: भाजपसाठी धोक्याची घंटा
जिल्हा परिषदेसोबतच पंचायत समित्यांच्या १३० गणांमध्येही चुरस पाहायला मिळाली. भाजप ५३ जागांसह आघाडीवर असला, तरी राष्ट्रवादी (४५) आणि शिवसेना (२९) यांची बेरीज ७४ वर जाते. विशेषतः कोरेगाव, पाटण आणि फलटणमध्ये राष्ट्रवादी-शिवसेना युतीचे वर्चस्व अधिक ठळक आहे. हेच चित्र जिल्हा परिषदेच्या अध्यक्ष निवडीत परावर्तित होण्याची शक्यता नाकारता येत नाही.
सत्तेच्या तीन शक्यता:
- राष्ट्रवादी + शिवसेना: भाजपला सत्तेबाहेर ठेवण्यासाठी हे नैसर्गिक समीकरण ठरू शकते.
- महायुतीचा 'स्टेट फॉर्म्युला': मुख्यमंत्री देवेंद्र फडणवीस आणि राज्यातील नेते हस्तक्षेप करून भाजप-शिवसेना-राष्ट्रवादी (अजित पवार गट) अशी एकत्रित सत्ता स्थापन करू शकतात.
- शिवसेनेची सौदेबाजी: अध्यक्ष आणि महत्त्वाची सभापती पदे आपल्याकडे खेचून घेण्यासाठी शिवसेना दोन्ही बाजूंकडून प्रस्ताव पदरात पाडून घेऊ शकते.
संपादकीय मत: साताऱ्याचे राजकारण नेहमीच 'केमिस्ट्री'वर चालले आहे. मग ते कृष्णा-वेण्णेचा संगम असो वा पाटण-कराडचे मैत्र. आज शंभूराजे देसाई, मकरंद पाटील आणि रामराजे नाईक निंबाळकर हा तिढा कसा सोडवतात, यावर जिल्ह्याचे भवितव्य अवलंबून आहे. भाजपचे नेतृत्व आणि राज्याचे मुख्यमंत्री देवेंद्र फडणवीस साताऱ्यात कोणता 'करिश्मा' करतात की सत्तेची पदे वाटून घेऊन समझोता होतो, हे पाहणे औत्सुक्याचे ठरेल.
सध्या तरी साताऱ्याचे 'कुलूप' शिवसेनेच्या हाती आहे... आता हे कुलूप भाजपच्या चावीने उघडणार की राष्ट्रवादीच्या, याचीच चर्चा सध्या जिल्हाभर रंगली आहे.