पाणी, वीज आणि रस्ते विकासाच्या प्रलंबित प्रश्नांवरून ५ जूनला गोंदवले खुर्द येथे बेमुदत रास्तारोको आंदोलन

पाणीटंचाई, रखडलेली वीज वाहिनी आणि अपूर्ण महामार्गाच्या निषेधार्थ शेतकऱ्यांचा एल्गार; प्रशासनाला दिला तीव्र इशारा!मागण्या मान्य होईपर्यंत हटणार नाही! गोंदवले खुर्द येथे ५ जूनला चाका जाम; कायदा-सुव्यवस्थेची जबाबदारी प्रशासनावर!

03 June, 2026

​दहिवडी / जरंडेश्वर समाचार वृत्त जनसेवा;

माण तालुक्यातील मौजे गोंदवले खुर्द, मौने आणि लोधवडे परिसरातील विविध प्रलंबित प्रश्नांकडे प्रशासनाचे लक्ष वेधण्यासाठी शुक्रवार, दि. ५ जून २०२६ रोजी सकाळी १० वाजल्यापासून गोंदवले खुर्द येथे शेतकऱ्यांच्या वतीने बेमुदत रास्तारोको आंदोलन करण्यात येणार आहे. याबाबतचे सविस्तर निवेदन तहसीलदार, माण (दहिवडी) यांना देण्यात आले असल्याची माहिती माजी जिल्हा परिषद सदस्य दिलीप रामचंद्र तुपे यांनी दिली आहे.

​पंचायत समिती सदस्य गौरी दिलीप तुपे यांच्या नेतृत्वाखाली हे आंदोलन छेडण्यात येणार असून, मागण्या मान्य होईपर्यंत आंदोलन मागे घेतले जाणार नाही, असा इशारा शेतकऱ्यांनी दिला आहे.

​तीव्र पाणीटंचाई आणि विजेचा प्रश्न गंभीर

​आंदोलनकर्त्यांनी दिलेल्या निवेदनात म्हटले आहे की, मौने, गोंदवले खुर्द व लोधवडे परिसरात गेल्या अनेक महिन्यांपासून तीव्र पाणीटंचाई निर्माण झाली आहे. यामुळे शेतकऱ्यांचे व शेतीचे मोठ्या प्रमाणात नुकसान होत असून, नागरिकांना पिण्याच्या पाण्यासाठीही वणवण करावी लागत आहे.

​तसेच, पळशी सबस्टेशनहून डी.पी. वीज वाहिनीचे काम अद्याप सुरू झाले नसल्याने परिसरातील नागरिक व शेतकरी कमालीचे अडचणीत आले आहेत. संबंधित वीज विभागाने तातडीने लक्ष देऊन हे काम मार्गी लावावे, अशी मागणी करण्यात आली आहे.

​महामार्गाचे अपूर्ण काम आणि अपघातांचे सत्र

​सातारा–पंढरपूर–लातूर या राष्ट्रीय महामार्गाचे काम अद्याप अपूर्ण अवस्थेत आहे. रस्त्यालगतची झाडे वाहतुकीच्या मुख्य मार्गावर आल्याने अपघातांचे प्रमाण वाढले आहे. विशेषतः धुळदेव व हिंगणी परिसरात अपूर्ण रस्ते कामांमुळे आजवर अनेक गंभीर अपघात घडले असून, काही निष्पाप नागरिकांना आपला जीवही गमवावा लागल्याचा संतप्त आरोप आंदोलनकर्त्यांनी केला आहे.

​प्रशासन जबाबदार राहणार: आंदोलकांचा इशारा

"या सर्व मूलभूत आणि गंभीर प्रश्नांकडे प्रशासनाने सातत्याने दुर्लक्ष केले आहे. म्हणूनच आम्हाला आंदोलनाचे पाऊल उचलावे लागत आहे. शुक्रवारच्या बेमुदत रास्तारोको आंदोलनादरम्यान कायदा व सुव्यवस्थेचा काही प्रश्न निर्माण झाल्यास, त्यास सर्वस्वी संबंधित प्रशासनच जबाबदार राहील."

— निवेदनातून इशारा

​या आंदोलनाच्या निवेदनाच्या प्रती दहिवडी पोलीस ठाणे तसेच महाराष्ट्र राज्य वीज मंडळ (महावितरण) उपविभाग, दहिवडी येथील संबंधित अधिकाऱ्यांना देऊन सतर्क करण्यात आले आहे. या आंदोलनात परिसरातील शेतकऱ्यांनी व नागरिकांनी मोठ्या संख्येने सहभागी व्हावे, असे आवाहन करण्यात आले आहे.