कोरेगावात ‘डिजिटल अरेस्ट’ टोळीचा पर्दाफाश

सातारा एलसीबीची धडक कारवाई; ३५ लाखांचा मुद्देमाल जप्त, २१ आरोपी ताब्यात

23 May, 2026

कोरेगाव दि. २३| जरंडेश्वर समाचार वृत्त जनसेवा: सातारा जिल्हा स्थानिक गुन्हे शाखेने (एलसीबी) कोरेगाव परिसरात सुरू असलेल्या कथित ‘डिजिटल अरेस्ट’ आणि सायबर फसवणूक रॅकेटचा पर्दाफाश करत मोठी कारवाई केली आहे. या कारवाईत २१ आरोपींना ताब्यात घेण्यात आले असून सुमारे ३५ लाख रुपयांचा मुद्देमाल जप्त करण्यात आल्याची माहिती समोर आली आहे.

पोलिसांनी दिलेल्या माहितीनुसार, संबंधित टोळी परदेशातील, विशेषतः अमेरिकन नागरिकांना लक्ष्य करत होती. स्वतःला पोलिस, सायबर अधिकारी किंवा केंद्रीय तपास यंत्रणांचे अधिकारी असल्याचे भासवून नागरिकांना “डिजिटल अरेस्ट”ची भीती दाखवली जात होती. आर्थिक गैरव्यवहार, मनी लॉन्डरिंग किंवा बनावट गुन्ह्यात अडकवल्याचे सांगून संबंधितांकडून ऑनलाईन व्यवहाराद्वारे मोठ्या प्रमाणात पैसे उकळले जात असल्याचा प्राथमिक तपासात संशय व्यक्त करण्यात येत आहे. 

एलसीबीच्या पथकाने मिळालेल्या गुप्त माहितीनुसार छापा टाकला असता संगणक, लॅपटॉप, मोबाईल हँडसेट, इंटरनेट उपकरणे, सिमकार्ड तसेच सायबर फसवणुकीसाठी वापरली जाणारी अन्य साहित्य असा मोठा मुद्देमाल जप्त करण्यात आला. पोलिसांकडून आरोपींच्या आर्थिक व्यवहारांचा, बँक खात्यांचा तसेच आंतरराज्यीय आणि आंतरराष्ट्रीय संपर्कांचा तपास सुरू आहे.

‘डिजिटल अरेस्ट’ म्हणजे काय?

सायबर गुन्हेगारांकडून नागरिकांना व्हिडिओ कॉल, बनावट नोटीस किंवा खोट्या कायदेशीर कारवाईची भीती दाखवून मानसिक दबावाखाली ठेवण्याच्या प्रकाराला ‘डिजिटल अरेस्ट’ असे संबोधले जाते. यात संबंधित व्यक्तीला सतत ऑनलाईन संपर्कात ठेवून त्याच्या बँक खात्यांची माहिती घेत आर्थिक फसवणूक केली जाते.

कोणते गुन्हे लागू होऊ शकतात?

प्राथमिक माहितीनुसार या प्रकरणात भारतीय न्याय संहिता (BNS) अंतर्गत फसवणूक, खोटी ओळख धारण करणे, गुन्हेगारी कट रचणे यांसह माहिती तंत्रज्ञान अधिनियम २००० अंतर्गत सायबर फसवणुकीचे विविध कलम लागू होण्याची शक्यता आहे. आर्थिक व्यवहार परदेशाशी संबंधित असल्यास केंद्रीय तपास यंत्रणांचाही तपासात सहभाग वाढू शकतो.

दरम्यान, या कारवाईमुळे सातारा जिल्ह्यात सुरू असलेल्या सायबर गुन्हेगारीच्या जाळ्याचा मोठा भांडाफोड झाल्याचे मानले जात असून, या प्रकरणातील आणखी धक्कादायक माहिती तपासातून पुढे येण्याची शक्यता व्यक्त केली जात आहे.