डिजिटल युगात समाजाभिमुख, विधायक पत्रकारितेची गरज - आमदार महेश शिंदे

कोरेगाव शहरांमध्ये पत्रकार भवन व पत्रकारांच्यासाठी गृहनिर्माण सोसायटी उभारणार!

10 January, 2026

कोरेगाव दि. १० (जरंडेश्वर समाचार):-पत्रकारितेला स्वतंत्र आणि गौरवशाली परंपरा असून, बदलत्या काळानुसार पत्रकारांनी नव्या तंत्रज्ञानाचा स्वीकार करत समाजाभिमुख व विधायक पत्रकारिता करावी. हे डिजिटल युग असून सोशल मीडिया, वेबसाइट, आर्टिफिशियल इंटेलिजन्स (AI) यांसारख्या आधुनिक साधनांचा प्रभावी वापर करून पत्रकारितेचा नावलौकिक वाढवावा, असे प्रतिपादन आमदार महेश शिंदे यांनी केले.

कोरेगाव येथील केशर हॉटेलच्या कॉन्फरन्स हॉलमध्ये आमदार महेश शिंदे विचार मंच व कोरेगाव नगरपंचायत यांच्या संयुक्त विद्यमाने पत्रकार दिनानिमित्त आयोजित कार्यक्रमात ते बोलत होते. यावेळी दर्पणकार बाळशास्त्री जांभेकर यांच्या प्रतिमेचे पूजन आमदार महेश शिंदे यांच्या हस्ते करण्यात आले.

आमदार शिंदे म्हणाले, "आज समाजात गुंडगिरी, गुन्हेगारी, अपघात व भ्रष्टाचाराच्या बातम्यांना टीआरपीसाठी मोठे स्थान दिले जाते; मात्र समाजात घडणान्या सकारात्मक, प्रेरणादायी कामांना न्याय मिळत नाही. अशा चांगल्या कार्यांना प्राधान्य देऊन त्यांना मोठ्या प्रमाणात प्रसिद्धी देणे ही पत्रकारांची सामाजिक जबाबदारी आहे."

डॉ. बाबासाहेब आंबेडकर यांनी सर्वसामान्यांना झोपडपट्टीतील तसेच श्रीमंतांना एकच मताचा अधिकार देऊन लोकशाही भक्कम केली. सामान्य माणसाचा आवाज बनून न्याय मिळवून देण्याचे काम पत्रकार करतात. लोकशाहीचे दोन स्तंभ असले तरी पत्रकारिता हा लोकशाहीचा तिसरा व महत्त्वाचा स्तंभ आहे, असे मतही त्यांनी व्यक्त केले. शेतकरी, कष्टकरी व सर्वसामान्यांच्या प्रश्नांना न्याय देण्याची भूमिका पत्रकारांनी ठामपणे पार पाडावी, असे आवाहन त्यांनी केले,

तसेच, 'सोशल मीडिया, AI, डिजिटल प्लॅटफॉर्म्स ही साधने स्कूटरसारखी आहेत; ती वापरण्याची गरज आहे. पत्रकारांनी स्वतःच्या वेबसाइट्स तयार कराव्यात, तंत्रज्ञानाचा पुरेपूर वापर करून पत्रकारिता अधिक सक्षम कराबी, कोरेगावमधील पत्रकार या दिशेने पुढे जात आहेत, याचा अभिमान वाटतो," असेही शिंदे म्हणाले. यावेळी कोरेगाव शहरात पत्रकार भवन उभारण्यात येईल, तसेच पत्रकारांच्या मागणीनुसार गृहनिर्माण सोसायटी उभारण्याबाबत सकारात्मक निर्णय घेतला जाईल, अशी ग्वाही आमदार शिंदे यांनी दिली.

पत्रकारितेचा ऐतिहासिक वारसा सुरेश बोतालजी

ज्येष्ठ पत्रकार सुरेश बोतालजी यांनी आपल्या भाषणात पत्रकारितेच्या इतिहासाचा आढावा घेतला. ते म्हणाले, "बाळशास्त्री गंगाधरशास्त्री जांभेकर हे मराठीतील आद्य पत्रकार असून त्यांनी ६ जानेवारी १८३२ रोजी 'दर्पण' हे पहिले मराठी वृत्तपत्र सुरू केले. इसवी सन पूर्व ५९ मध्ये रोममध्ये पत्रकारितेचा आरंभ झाला, तर भारतात १७८० पासून पत्रकारितेला खऱ्या अर्थाने सुरुवात झाली."

पत्रकार हे समाजाचा आरसा असून समाजातील व्यथा, वेदना व प्रश्न लोकांपर्यंत पोहोचवण्याचे कार्य ते करतात. पत्रकार कोणत्याही राजकीय पक्षाचा कार्यकर्ता नसून, सर्व लोकप्रतिनिधींशी त्यांचे व्यावसायिक संबंध असतात, हे त्यांनी स्पष्ट केले. यावेळी बोतालजी यांनी कोरेगाव शहरात ३०० कोटी रुपयांचे मल्टी स्पेशालिटी हॉस्पिटल उभारावे, तसेच साहित्यरत्न अण्णाभाऊ साठे यांचा पुतळा व स्मारक उभारावे, अशा मागण्या आमदारांच्या समोर मांडल्या.

पत्रकार भवन व गृहनिर्माण सोसायटीची मागणी गणेश बोतालजी यांनी कोरेगाव शहरात पत्रकार भवन तसेच पत्रकारांसाठी गृहनिर्माण सोसायटी उभारण्याची मागणी केली.

कार्यक्रमाचे आयोजन राहुल बर्गे (सदस्य, जिल्हा नियोजन समिती) यांनी केले. पत्रकार समाजाला न्याय देण्याचे कार्य करीत असून, पुढील काळात सामाजिक बांधिलकी जपत पत्रकारांनी कार्य करावे, असे आवाहन त्यांनी केले.

या कार्यक्रमास नगरपंचायतचे नगरसेवक साईप्रसाद बर्गे, महेश बर्गे, सुनील बर्गे, सचिन बर्गे, अर्जुनदादा आवटे, परशुराम बर्गे, सागर बर्गे, सागर विरकर, राजेंद्र वैराट, विजय घोरपडे, नितीन ओस्वल, संतोष बर्ग, दीपक फाळके, अजित बर्गे, वैभव बर्गे, संतोष आबा जाधव, तसेच निलेश यादव (तालुकाध्यक्ष, भाजपा) आदी उपस्थित होते.

यावेळी पत्रकार दिनानिमित्त पत्रकारांचा सन्मान करण्यात आला या पत्रकार दिनाच्या कार्यक्रमास साहिल शहा, प्रकाश गायकवाड, गणेश बोतालजी, शेखर रसाळ, राजेंद्र वाघ, राजेंद्र तरडेकर, हनुमंत बर्गे, पांडुरंग बर्गे, नवनाथ पवार, सतीश गायकवाड, अजजू मुल्ला, अधिक बर्गे, दादा वाकडे, सोमनाथ शिंदे, विक्रम जगदाळे, संतोष नलवडे आदी उपस्थित होते. कार्यक्रमाचे आभार महेश बर्गे यांनी मानले.