भर पावसात खड्ड्यात वृक्षारोपण: कोरेगावात महाविकास आघाडीचे अनोखे आंदोलन

"शासन जागे न झाल्यास आणखी तीव्र आंदोलनाचा इशारा" ;"शिवसेना, मनसे, राष्ट्रवादीचे पदाधिकारी व कार्यकर्ते एकत्र"आंदोलन आणखीन तीव्र करू असा इशारा दिला

23 September, 2025

कोरेगाव दि.२३(जरंडेश्वर समाचार):कोरेगाव ते डी.पी. भोसले महाविद्यालय या मुख्य रस्त्यावरील खड्ड्यांमुळे नागरिकांचा जीव अक्षरशः त्रस्त झाला आहे. याच समस्येकडे लक्ष वेधण्यासाठी महाविकास आघाडीच्या कार्यकर्त्यांनी भर पावसात थेट खड्ड्यात झाडे लावून प्रशासनाविरोधात तीव्र निषेध व्यक्त केला. तहसील कार्यालयासमोर हे आंदोलन पार पडले.

 अर्ज देऊन, तरीही प्रशासन बेफिकीर,शिवसेना (उद्धव ठाकरे गट) चे शहराध्यक्ष अक्षय बर्गे आणि मनसेचे तालुकाध्यक्ष सागर बर्गे यांनी सार्वजनिक बांधकाम विभागाच्या (PWD) कडे अर्ज दाखल करून रहिमतपूर रोडवरील खड्डे तातडीने बुजवण्याची मागणी केली होती. मात्र, repeated मागण्या, इशारे आणि अल्टीमेटम देऊनही संबंधित विभागाने कोणतीही दखल घेतली नाही. परिणामी अखेर "खड्ड्यांत वृक्षारोपण" ही प्रत्यक्ष कृती करावी लागली.

विद्यार्थ्यांचा त्रास, नागरिकांचा संताप,या रस्त्यावरून दररोज डी.पी. भोसले महाविद्यालयाचे विद्यार्थी-विद्यार्थिनी प्रवास करतात. खड्ड्यांत पाणी साचल्याने वाहने गेल्यावर पाणी व चिखल अंगावर उडतो. त्यामुळे विद्यार्थ्यांचे कपडे खराब होतात आणि त्रास सहन करावा लागतो. नागरिकांचेही हाल होऊन अपघातांच्या घटनाही वाढल्या आहेत.

शासनाला दिला इशारा,"आम्ही प्रशासनाला इशारे दिले, पण त्यांना याची फिकीर नाही. त्यामुळे आंदोलनाशिवाय दुसरा पर्याय नाही," असे आंदोलनकर्त्यांनी सांगितले. यावेळी पुन्हा एकदा स्पष्ट इशारा देण्यात आला की, "आता तरी जर खड्डे बुजवले नाहीत, तर मनसे आणि शिवसेना स्टाईलने आणखी मोठ्या प्रमाणात रस्त्यावर उतरून आंदोलन छेडण्यात येईल. याची सर्वस्वी जबाबदारी शासनाची राहिल.

या आंदोलनावेळी शिवसेनेचे माजी जिल्हाप्रमुख दिनेश बर्गे, राष्ट्रवादी काँग्रेसचे अमर बर्गे, संदीप कळसे, राहुल कळसे, अनिकेत बर्गे, प्रशांत गुरव यांच्यासह मनसे, शिवसेना आणि राष्ट्रवादी काँग्रेसचे प्रमुख पदाधिकारी व कार्यकर्ते मोठ्या संख्येने उपस्थित होते.

महाविकास आघाडीच्या या आंदोलनामुळे कोरेगाव ते डी.पी. भोसले महाविद्यालय मार्गावरील खड्ड्यांचा प्रश्न पुन्हा एकदा चर्चेत आला आहे. "शासन व सार्वजनिक बांधकाम विभागाने तातडीने रस्त्यांची दुरुस्ती करावी, अन्यथा पुढील आंदोलन आणखी तीव्र करण्यात येईल," असा इशारा नेत्यांनी दिला.