साताऱ्यात भारत विकास परिषदेचा उपक्रम : ४६ दिव्यांगांना मोफत कृत्रिम अवयवांचे वाटप

डॉ. युवराज करपे : “दिव्यांगांच्या जीवनात सुखाचा दीपस्तंभ ठरणारा उपक्रम”

22 September, 2025

सातारा. | दि.२२( जरंडेश्वर समाचार) :-दिव्यांगांच्या जीवनात आत्मविश्वास आणि आनंद निर्माण करण्यासाठी भारत विकास परिषदेने साताऱ्यातील रौप्यमहोत्सवी वर्षानिमित्त भव्य कार्यक्रमाचे आयोजन केले. या उपक्रमांतर्गत ४६ दिव्यांगांना मोफत अत्याधुनिक कृत्रिम अवयवांचे वाटप करण्यात आले. पुणे दक्षिण, पिंपरी-चिंचवड आणि सातारा शाखेच्या संयुक्त सहकार्याने हा सामाजिक उपक्रम राबविण्यात आला.

कार्यक्रमाची सुरुवात वंदे मातरम् गायनाने झाली. भारत माता व स्वामी विवेकानंद यांच्या प्रतिमेचे पूजन करून पुढील सत्रास प्रारंभ झाला. दिव्यांगांच्या जीवनात परिवर्तन घडविणारा हा क्षण उपस्थित सर्वांसाठी भावनिक ठरला.

मुख्य पाहुणे जिल्हा शल्यचिकित्सक डॉ. युवराज करपे यांनी या उपक्रमाला “दिव्यांगांच्या जीवनात सुख निर्माण करणारा दीपस्तंभ” असे संबोधले. त्यांनी सांगितले की, “मोफत कृत्रिम अवयव मिळाल्याने दिव्यांग बांधवांमध्ये आत्मविश्वास जागृत होऊन ते आयुष्यात पुढे जाण्यास सक्षम ठरणार आहेत.”

कार्यक्रमाच्या अध्यक्षा डॉ. चेतना माजगावकर यांनीही आपले विचार व्यक्त केले. त्या म्हणाल्या, “या उपक्रमामुळे दिव्यांगांना केवळ कृत्रिम हातपायच मिळणार नाहीत, तर त्यांना जगण्याचा नवा आधार आणि मोठा आनंद लाभणार आहे. त्यातून त्यांच्या व्यक्तिमत्त्वात आत्मविश्वास वृद्धिंगत होईल.”

यावेळी पुण्यातील स्वआधार केंद्राचे श्री. जयंत जेस्ते यांनी उपस्थितांना मार्गदर्शन केले. त्यांनी कृत्रिम अवयवांचा योग्य वापर, निगा आणि सुरुवातीच्या काळात घ्यावयाची काळजी याबाबत सविस्तर माहिती दिली.

हा उपक्रम केवळ साधनांचे वितरण न राहता, दिव्यांगांना नवी उमेद, नवे ध्येय आणि नवा जीवनप्रवास सुरू करण्याची प्रेरणा देणारा ठरला. सामाजिक जबाबदारीची जाणीव जपणारे असे उपक्रम महाराष्ट्रातील विविध जिल्ह्यांमध्येही होत आहेत.

साताऱ्यातील या समारंभाने दिव्यांग बांधवांना नवी दिशा देत समाजाच्या सर्वांगीण प्रगतीचा संदेश दिला