"जीआरशिवाय लावलेले लोकप्रतिनिधींचे फलक काढून टाका" – महारुद्र तिकुंडे

"शासकीय निधीवर वैयक्तिक श्रेयाची पाटी नको!""सार्वजनिक निधीवर लोकप्रतिनिधींचा ठसा अयोग्य" – युवा राज्य फाउंडेशनची भूमिका

29 August, 2025

"शासकीय जीआरशिवाय विकासकामांवरील लोकप्रतिनिधींचे फलक काढून टाका" – महारुद्र तिकुंडे यांची मागणी

सातारा दि. २९ (जरंडेश्वर समाचार): सातारा जिल्ह्यातील विकासकामांवर आमदार, खासदार आणि विविध लोकप्रतिनिधींच्या नावाचे फलक व बोर्ड लावले जातात. मात्र, अशा फलकांवर उल्लेख करण्यासाठी शासनाने कोणतेही जीआर (शासन निर्णय) जारी केलेला नसेल, तर हे फलक तातडीने काढून टाकावेत, अशी ठाम मागणी युवा राज्य फाउंडेशनचे संस्थापक अध्यक्ष तसेच माहिती अधिकार कार्यकर्ते महारुद्र तिकुंडे यांनी केली आहे.

फलकांवर नाव लावण्याची प्रथा अयोग्य

तिकुंडे यांनी आपल्या निवेदनात म्हटले आहे की, सार्वजनिक विकासकामे ही शासनाच्या निधीतून, शासकीय योजना किंवा सार्वजनिक करातून होत असतात. त्यामुळे ही कामे नागरिकांची मालमत्ता असून त्यावर कोणत्याही लोकप्रतिनिधीने व्यक्तिगत मालकीचा शिक्का मारणे योग्य नाही. अशा प्रकारे आमदार-खासदारांच्या नावांचे फलक लावणे ही जनतेची दिशाभूल करणारी पद्धत असून प्रशासनाने यात हस्तक्षेप करणे गरजेचे आहे.

जनतेची दिशाभूल थांबवा

"निधी हा शासकीय असतो, मग तो स्थानिक विकास निधी असो किंवा खासदार/आमदार निधी असो. हा निधी कुणाच्याही वैयक्तिक खिशातून आलेला नसतो. तरीदेखील काही लोकप्रतिनिधी स्वतःचे श्रेय घेण्यासाठी फलक लावतात, हे जनतेची दिशाभूल करणारे आहे," असे तिकुंडे यांनी स्पष्ट केले.

प्रशासनाने कारवाई करावी

त्यांनी मागणी केली की, जिल्हा प्रशासनाने तसेच स्थानिक स्वराज्य संस्थांनी याबाबत तातडीने नियमावली लागू करावी. "शासकीय जीआर असेल तरच फलक लावण्यास परवानगी द्यावी, अन्यथा असे फलक जप्त करून कारवाई करावी," अशी मागणी तिकुंडे यांनी प्रशासनाकडे केली आहे.

सार्वजनिक प्रतिसाद

या मागणीबाबत नागरिकांतूनही सकारात्मक प्रतिसाद व्यक्त होत असून, "सार्वजनिक पैशातून होणाऱ्या कामांचे श्रेय कोणत्याही व्यक्तीला न देता ते केवळ शासनाचे असल्याचे मानले पाहिजे," असे मत नागरिकांनी व्यक्त केले आहे.