विवेकशील राष्ट्र उभारणीसाठी विज्ञानवादी दृष्टिकोन आत्मसात करण्याची गरज – प्रशांत पोतदार यांचे स्पष्ट मत

अंधश्रद्धा दूर करून विज्ञानाची कास धरा – पोतदार यांचे विद्यार्थ्यांना आवाहन;'अंधश्रद्धा सोडा, वैज्ञानिक दृष्टिकोन अंगीकारा'

29 August, 2025

विवेकशील राष्ट्र उभारणीसाठी विज्ञानवादी दृष्टिकोन आत्मसात करण्याची गरज – प्रशांत पोतदार यांचे स्पष्ट मत

कराड दि.२९ (जरंडेश्वर समाचार):"कोणत्याही राष्ट्राची खरी प्रगती ही त्या देशातील नागरिकांच्या विवेकशीलतेवर अवलंबून असते. समाजातील अंधश्रद्धा, आंधळा अनुकरण व अज्ञान दूर करून वैज्ञानिक विचारधारा अंगीकारली, तरच खऱ्या अर्थाने विवेकाधिष्ठित आणि सुजाण राष्ट्राची उभारणी होऊ शकते," असे प्रतिपादन महाराष्ट्र अंधश्रद्धा निर्मूलन समितीचे राज्य कार्यकारिणी सदस्य प्रशांत पोतदार यांनी केले.

राष्ट्रीय विज्ञान दिनाचे औचित्य साधून श्री शिवाजी शिक्षण संस्था, उच्च शिक्षण मंडळ, कराडच्या वेणूताई चव्हाण महाविद्यालयातील समाजशास्त्र विभाग, महाराष्ट्र अंधश्रद्धा निर्मूलन समिती – कराड शाखा आणि सामाजिक शास्त्रे व विवेक वाहिनी मंडळ यांच्या संयुक्त विद्यमाने आयोजित विशेष व्याख्यानात ते प्रमुख पाहुणे म्हणून बोलत होते.

कार्यक्रमात वैचारिक समृध्दीचा जागर,या कार्यक्रमाच्या अध्यक्षस्थानी महाविद्यालयाच्या प्राचार्या डॉ. (सौ.) एस.आर. सरोदे होत्या. उपप्राचार्य बाळ देवधर आणि आर.ए. कांबळे हे देखील व्यासपीठावर उपस्थित होते. कार्यक्रमाच्या प्रारंभी विद्यार्थ्यांना अंधश्रद्धा निर्मूलन आणि व्यसनमुक्ती या विषयांवर शपथ देण्यात आली. त्यामुळे विद्यार्थ्यांमध्ये वैज्ञानिक दृष्टिकोन विकसित करण्याचा महत्त्वाचा प्रयत्न झाला.

प्रगत समाजासाठी वैज्ञानिक दृष्टिकोन अनिवार्य – पोतदार,प्रशांत पोतदार यांनी आपल्या प्रभावी भाषणात अंधश्रद्धेची उदाहरणे देत तिचा समाजावर होणारा विपरीत परिणाम स्पष्ट केला. "ग्रह-नक्षत्र, साप-नाग, अंगात येणे, जादूटोणा, भोंदू बाबांची पूजा अशा अंधश्रद्धा समाजाच्या मानसिकतेला कुंठित करतात. या अंधश्रद्धा विज्ञानाच्या मार्गातील मोठी अडचण बनल्या आहेत. त्यामुळे युवकांनी वैज्ञानिक पद्धतीने विचार करून समाजात जागरूकता निर्माण करावी," असे आवाहन त्यांनी केले.

प्रास्ताविक, सूत्रसंचालन आणि आभार प्रदर्शन,या कार्यक्रमाचे प्रास्ताविक प्रा. आर.पी. पवार यांनी केले. प्रमुख पाहुण्यांचा परिचय डॉ. एन.ए. पाटील यांनी करून दिला. श्रीमती एस.एम. चव्हाण यांनी सुत्रसंचालन करत कार्यक्रमाची अखंड सुसूत्रता राखली, तर श्रीमती एस.पी. पवार यांनी उपस्थितांचे आभार मानले.

यशस्वी आयोजनासाठी विशेष परिश्रम,कार्यक्रमाच्या यशस्वी आयोजनासाठी प्रा. अशोक माळी (समाजशास्त्र विभाग) आणि विवेक वाहिनी समितीचे डॉ. आत्माराम मुळीक यांनी विशेष परिश्रम घेतले. त्यांनी विद्यार्थ्यांमध्ये विज्ञानविषयक उत्सुकता निर्माण होईल अशा स्वरूपात संवादात्मक पद्धतीने कार्यक्रम राबवण्यावर भर दिला.

विद्यार्थ्यांचा उत्स्फूर्त सहभाग ,या कार्यक्रमात महाविद्यालयातील अनेक विद्यार्थ्यांनी सहभाग नोंदवला. विज्ञानदिनानिमित्त अशा उपक्रमातून विद्यार्थ्यांमध्ये केवळ माहितीच नव्हे, तर कृतीशील विचारसरणी विकसित होणे हे काळाची गरज असल्याचे वक्त्यांनी अधोरेखित केले.

समाजात विवेक, विचार आणि विज्ञान यांचा गजर करणारे असे कार्यक्रम जर अधिक मोठ्या प्रमाणावर आणि सातत्याने राबवले गेले, तर समाजात होणाऱ्या अंधश्रद्धेच्या विळख्यातून सुटका होऊन, खऱ्या अर्थाने विवेकशील भारताची वाटचाल शक्य होईल, असा विश्वास सर्व उपस्थितांनी व्यक्त केला.